ސިންގަމް 3 ބެލުންތެރިންނަށް ފެންނާނީ 2023 ގައި

ރީހިތް ޝެޓީގެ ކާމިޔާބު ފިލްމު ފްރެންޗައިސް "ސިންގަމް"ގެ 3 ވަނަ ފިލްމު ރިލީޒްކުރުން 2023 ވަނަ އަހަރު އިންޑިޔާގެ މިނިވަން ދުވަހުގެ ބަންދަށް ތާވަލް ކޮށްފައިވާކަމަށް ހަބަރުތަކުން ބުނެފިއެވެ.

ކުށް ހުއްޓުވުމަށް ފުލުހަކު ކުރާ މަސައްކަތް ދައްކުވައިދޭ މި ފިލްމުތަކުގައި ބަލަތުގެ ގޮތުގައި ފެންނީ އަޖޭ ދޭވްގަން އެވެ. މި ފްރެންޗައިންގެ ކުރީގެ ދެ ފިލްމަކީވެސް ކާމިޔާބު ދެ ފިލްމުކަން ފާހަގަ ކޮށްލެވެއެވެ.

ހަބަރުތަކުން ރިޕޯޓްކުރާ ގޮތުގައި ފިލްމުގެ ސޫޓިންތައް ކުރިއަށްދާނީ ކަޝްމީރު އަދި ދިއްލީގައެވެ. ސިންގަމްގެ 3 ވަނަ ފިލްމެއް ގެނެސްދިނުމަށް ސްކްރިޕްޓް ލިޔަމުން ދާވާހަކަ މީގެ ކުރިން އެ ޓީމުން ވަނީ ހާމަކޮށްފައެވެ. މި ފިލްމުގެ ތެރެއިން ކޮންމެވެސް ހިސާބަކުން ސޫރިޔަވަންސީގައި އަކްޝޭގެ ކެރެކްޓާއާއި ސިންބާގައި ރަންވީރު ކުޅުނު ކެރެކްޓާވެސް ފެނިގެން ދާނެ ކަމަށްވެސް މައުލޫމާތު ލިބެއެވެ.

އެ ދެ ފިލްމަކީވެސް ރޯހިތްގެ ފިލްމުތަކެވެ. އެގޮތުން މިއަހަރު ރިލީޒްކުރި ސޫރިޔަވަންސީގައިވެސް އަޖޭ އާއި ރަންވީރު އެމީހުންގެ ކެރެކްޓާތަކުން ފެނިގެން ދިޔައެވެ.