ލަންކާގެ ފުޓްބޯޅަ މުބާރާތް ޝަރަފުވެރިކޮށްދެއްވުމަށް ރައީސް ލަންކާއަށް

ސްރީލަންކާގައި މާދަމާ ފެށުމަށް ހަމަޖެހިފައިވާ "ޕްރައިމް މިނިސްޓަރ މަހިންދަ ރާޖަޕަކްސަ ޓްރޮފީ" ފުޓްބޯޅަ މުބާރާތް ފެށުމަށް ޓަކައި ބާއްވާ ހާއްސަ ރަސްމިއްޔާތު ޝަރަފުވެރިކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ސްރީލަންކާއަށް ފުރާވަޑައިގެންފިއެވެ.

ރައީސް އޮފީހުން ބުނީ ލަންކާގެ ރައީސް ގޮތަބަޔާ ރާޖަޕަކްސާގެ ހާއްސަ ދައުވަތަކަށް މުބާރާތް ފެށުމުގެ ރަސްމިއްޔާތުގެ ޝަރަފުވެރި މެހެމާނަކަށް ރައީސް ސޯލިހް ލަންކާއަށް ވަޑައިގަންނަވާނެ ކަމަށެވެ.

ރާއްޖެއާ ސްރީލަންކާ، ބަންގްލަދޭޝް އަދި ސީޝެލްސް ހިމެނޭގޮތަށް ފަށާ މި މުބާރާތް ފެށުމުގެ ގޮތުން މާދަމާ ކުޅޭ ފުރަތަމަ މެޗްގައި ބައްދަލުކުރުމަށް ހަމަޖެހިފައި ވަނީ ރާއްޖެއާ ސްރީލަންކާގެ ޓީމެވެ.

މުބާރާތުގައި ދިވެހި ސަޕޯޓަރުންނަށް އަގުހެޔޮ ޓިކެޓް ލިބޭނެ އިންތިޒާމު ވެސް ރައީސްގެ އެދިވަޑައިގަތުމަކަށް ވަނީ ހަމަޖައްސައިފަ އެވެ. ކުރިން 5.000 ރުޕީސް އަށް ޥިއްކި ޓިކެޓް މިހާރު ވަނީ 3000 ރުޕީސްއަށް ދަށްކޮށްފަ އެވެ.

ރައީސް ސޯލިހު ސްރީލަންކާއަށް ކުރައްވާ މި ދަތުރުފުޅުގައި ބޮޑުވަޒީރު މަހިންދަ ރާޖަޕަކްސައާއި ސްރީލަންކާގެ ރައީސް ގޮތާބަޔާ ރާޖަޕަކްސައާ ބައްދަލުކުރައްވައި ރަސްމީ ވާހަކަތައް ބޭއްވުމަށް ހަމަޖެހިފައިވާކަމަށް ރައީސް އޮފީހުން ބުންޏެވެ.