އަންދާޒް އަޕްނާ އަޕްނާގެ ސީކުއަލްގެ ސްކްރިޕްޓް ލިޔެ ނިންމާލައިފި

އަދިވެސް ގިނަ ބައެއްގެ "އޯލްޓަމް ފޭވަރިޓް" އަންދާޒް އަޕްނާ އަޕްނާގެ ސީކުއަލްގެ ވާހަކަ ދެކެވޭތާ ދުވަސްކޮޅެއް ވެފައިވާއިރު ދެވަނަ ފިލްމުގެ ސްކްރިޕްޓް ލިޔެ ނިމިފައިވާކަމަށް ރާޖްކުމާރު ސަންތޯޝީ ބުނެފި އެވެ.

އަންދާޒް އަޕްނާ އަޕްނާއަކީވެސް ރާޖްކުމާރުގެ ވާހަކައެކެވެ. އަދި އެފިލްމު ޑައިރެކްޓްކޮށްފައިވަނީ ވެސް އޭނާއެވެ. 1994 ވަނަ އަހަރު ނެރުނު މި ފިލްމުން ފެނިގެން ގޮސްފައިވަނީ އާމިރު ޙާން، ސަލްމާން ޙާން، ކަރިޝްމާ ކަޕޫރް އަދި ރަވީނާ ޓެންޑޮންއެވެ.

އީޓައިމްސް އަށް ދިން އިންޓަވިއުއެއްގައި ރާޖްކުމާރު ބުނީ ސީކުއަލްގައި ކާސްޓު ކުރާނީ އާ ތަރިންކަމަށާއި އެކަމަށް ވަގުތު ނަގާނެކަމަށެވެ.

ރާޖްކުމާރު އެންމެ ފަހުން ނެރެފައިވަނީ ޝާހިދު ކަޕޫރް ލީޑުން ފެނިގެން ދިޔަ ކޮމެޑީ ފިލްމް "ޕަޓާ ޕޯސްޓާރ ނިކްލާ ހީރޯ" އެ ފިލްމު ބެލުންތެރިންގެ މެދުގައި ހިނގާފައެއް ނުވެއެވެ.