ސޫރްޔަވަންޝީއަށް ބޮޑު ކާމިޔާބީއެއް

ކޮވިޑާ ގުޅިގެން އިންޑިޔާގެ ސިނަމާތައް ބަންދުކޮށްފައި އޮތުމަށްފަހު އަލުން ހުޅުވާ ސިނަމާތަކުގައި ފިލްމުތައް ދައްކަން ފަށާފައިވަނީ ނިމިގެން ދިޔަ އޮކްޓޯބަރު މަސްތެރޭގައެވެ.

އެއާއެކު ރިލީޒް ނުކުރެވިހުރި ބޮޑެތި ފިލްމުތަކުން ރިލީޒް ތާރީހުތައް ނެރެން ފެށި އެވެ. އެގޮތުން އެންމެ ފުރަތަމަ ސިނަމާއަށް އައި އަކްޝޭ ކުމާރުގެ ސޫރިޔަވަންޝީ ވެގެންގޮސްފައި މިވަނީ ކޮވިޑަށް ފަހު ސިނަމާގައި އެޅުވި ފުރަތަމަ ފިލްމަށެވެ.

އެ ފިލްމަށް ލިބެމުންދާ ތަރުހީބުވެސް ބޮޑެވެ. އެގޮތުން ފުރަތަމަ ހަފްތާ ބަންދުގައި 77 ކްރޯޑް ލިބިފައިވާއިރު ފިލްމުން ގާއިމުކޮށްފައިވާ ރެކޯޑަކީ ކޮވިޑްގެ ތެރޭގައި އެޅުވި އެއްވެސް ފިލްމަކަށް ލިބިފައިނުވާވަރުގެ ރެކޯޑެކެވެ.

ބްލޮކްބަސްޓާއަކާ ދިމާލަށް ފިލްމު ދަތުރު ކުރަމުންދާއިރު މި ފިލްމު މިހާރުވަނީ އަކްޝޭގެ އެހެން ފިލްމުތަކުގެ ރިކޯޑް މުގުރާލާފައެވެ. އެގޮތުން ރިލީޒްކުރާ ހަފުތާ ބަންދުގައި އެންމެ ރަނގަޅު ވިޔަފާރިއެއް ވީ ފިލްމުގެ ރެކޯޑް ކުރިން އޮތީ އަކްޝޭގެ "މިޝަން މަންގަލް" އަށެވެ.

ދެން އެންމެ އަވަހަށް ސިނަމާތަކަށް އަންނާނީ ރާނީ މުކަރްޖީއާއި ސައިފް އަލީ ޚާންގެ ބަންޓީ އޯރު ބަބްލީ އެވެ. އެއަށްފަހު ރަންވީރުގެ 83 އާއި އަކްޝޭގެ ޕްރިތްވީރާޖްވެސް ކުރިއަށް އެބަ އޮތެވެ.