ފިންގަޕްރިންޓްގެ ޑޭޓާ ބޭސްއެއް ހަދަަން ފާސްކޮށްފި

މީހުންގެ އައިޑެންޓިޓީ ވެރިފައި ކުރެވޭ ގޮތަށް ފިންގަޕްރިންޓާ ގުޅޭ ޑޭޓާ ބޭސްއެއް ގާއިމު ކުރަން ރައްޔިތުންގެ މަޖިލީހުން ފާސް ކޮށްފި އެވެ.

މަޖިލީހުގެ އެ ނިންމުން ފާސްކުރީ އިންފޮމޭޝަން، ޓެކްނޮލޮޖީ، ސައިންސް އަދި ކޮމިއުނިކޭޝަންގެ ދާއިރާގައި ރާއްޖެ އޮތް ހާލަތު ދެނެގަންނަަން ހެދި އެސެސްމަންޓަށް ފަހު ގައުމީ ތަަރައްގީއާއި ތަރިކައިގެ ކޮމިޓީން ދިރާސާކޮށް އެކުލަވައިލި ރިޕޯޓުގައި އެގޮތަށް ލަފާ ދީފައި އޮތުމުން ނެވެ.

އައިސީޓީގެ ރިޕޯޓުގައި ބުނެފައިވާ ގޮތުގައި މި ވަގުތު ރާއްޖޭގައި އިންފޮމޭޝަން، ޓެކްނޯލޮޖީ، ކޮމިއުނިކޭޝަން އަދި ސައިންސްގެ ރޮނގުން މަސައްކަތްތައް ކުރަމުންދަނީ ގައުމަށް އެންމެ ފައިދާހުރި ގޮތަކު ނޫނެވެ. އެ ދާއިރާ ރަނގަޅުކުރަން ގިނަ ލަފާތަކެއް ދީފައި ވެއެވެ.

ދިއްގަރު ދާއިރާގެ އެމްޑީޕީ މެމްބަރު އިކްރާމް ހަސަން އެދިވަޑައިގަތުމަކާ ގުޅިގެން އެކުލަވާލި އެސެސްމަންޓްގެ ރިޕޯޓު މިއަދު މަޖިލީހުގެ ތަޅުމުން ފާސްކުރީ 51 މެމްބަރުންގެ ވޯޓުންނެވެ. އެ ދާއިރާގެ ހާލަތު ދެނެގަތުމަށް، ފުޅާ ދާއިރާއެއްގައި ކަމާބެހޭ އެންމެހާ މުއައްސަސާތަކާ މަޝްވަަރާ ކުރުމަށް ފަހު ކޮމިޓީން އެކުލަވައިލި ރިޕޯޓްގައި އޮތީ ތަފާތު ތިން ކެޓަގަރީއަކުން މަސައްކަތްތަކެއް ކުރަން ސަރުކާރަށް ލަފާދޭށެވެ. އެއީ ޓެކްނޮލޮޖީގެ ދާއިރާ އާއި ކޮމިއުނިކޭޝަންގެ ދާއިރާ އާއި ޕްލޭނިންް ދާއިރާ އެވެ.

އެގޮތުން އެކި ހިދުމަތް ހޯދާ އިރު އައިޑީ ކާޑު ހުށަހަޅަން ޖެހުމާއި އަދި އެ ކާޑުގެ ކޮޕީ ހައްދަން ޖެހުމުގެ މައްސަލަ ފާހަގަ ކޮށްފައިވެ އެވެ. ނަމަވެސް އޭގެ ބަދަލުގައި ބަޔޮމެޓްރިކް ނިޒާމަކަށް ބަދަލުކޮށް ޕަބްލިކް އިންފްރާސްޓަކްޗާގެ ތެރެއަށް ޑިޖިޓަލް ސެޓްފިކެޓް ވަނުމުގެ މުހިއްމުކަން ފާހަގަ ކޮށްފައިވެ އެވެ. އަދި ވޯކް ޕަމިޓް ވިޒާ ހޯލްޑަރެއް ކަމުގައި ވިޔަސް ފިންގަ ޕްރިންޓުން އެ މީހެއްގެ ތަފުސީލު އެނގުން މުހިންމު ކަމަށް ފާހަގަކޮށްފައި ވެއެވެ.

މިއަދު ފާސްކުރި އެ ރިޕޯޓާއެކު އައިސީޓީ ދާއިރާ އިތުރަށް ފުޅާކޮށް ހަރުދަނާކުރުމަށްޓަކައި ރައީސް އޮފީހުގެ ޗީފް ޓެކްްނޮލޮޖީ އޮފިސަރާއި އެންވަޔަރަމަންޓް މިނިސްޓްރީ އަދި ކަމާގުޅޭ އެންމެހާ ފަރާތްތައް ގުޅިގެން ކުރިއަށް އޮތް ހަތަރު މަސްދުވަހުގެ ތެރޭގައި އިންފޮމޭޝަން ޓެކްނޮލޮޖީ ސައިންސް އަދި ކޮމިއުނިކޭޝަންގެ ދާއިރާގެ އިމްޕްލިމެންޓޭޝަން ޕްލޭނެއް ވެސް އެކުލަވާލަން ޖެހޭނެ އެވެ.