ކޮވިޑަށް ފަހު އެންމެ ބާރަށް ކުރިއަރާ ދެވަނަ ގައުމަކަށް ރާއްޖެ ވާނެ: އަމީރު

ރާއްޖެ ހިމެނޭނީ ކޮވިޑަށް ފަހު އެންމެ ބާރަށް ކުރިއަރާ ފަސް އިގްތިސާދުގެ ތެރެއިން އެއް އިގްތިސާދުގެ ގޮތުގައިކަމަށް ފިނޭންސް މިިނިސްޓަރު އިބްރާހިމް އަމީރު ލަފާ ކުރައްވައިފިއެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައި މިނިސްޓަރު ވަނީ ކުރިއަށް އޮތް ތަނުގައި އެ ލިސްޓުގެ ދެވަނައަށް ރާއްޖެ އަރާނެ ކަމަށް ލަފާކުރައްވާފައެވެ. އެގޮތުން މިނިސްޓަރު ވިދާޅުވީ ކޮވިޑުގެ ހާލަތުން އަރައިގަތުމަށް ސަރުކާރުން އެޅި ފިޔަވަޅުތަކުގެ ރަނގަޅު ނަތީޖާ މިހާރު ވެސް ފެންނަމުންދާ ކަމަށެވެ.

މިނިސްޓަރު ވިދާޅުވީ އައިއެމްއެފްގެ ވޯލްޑް އިކޮނޮމިކް އައުޓްލުކްގެ އަންދާޒާއަށް ބަލައި ދުނިޔޭގެ ހަތަރުވަނައަށް އެންމެ އަވަހަށް ކުރިއަރާނެ އިގްތިސާދަކީ ރާއްޖެކަމަށެވެ.

ނަތީޖާ ރަނގަޅު ނަމަވެސް، ކޮވިޑުގެ ސަބަބުން ރާއްޖެއަށް ކުރިމަތިވި އިގްތިސާދީ ގެއްލުން ހަނދާން ނައްތާލައިގެން ނުވާނެ ކަމަށް މިނިސްޓަރު ވިދާޅުވިއެވެ. މިނިސްޓަރު އަމީރު ވިދާޅުވީ ކުރިއަށް އޮތް ތަނުގައި ދައުލަތަށް އާމްދަނީ އިތުރު ކުރުމަށް ޓަކައި ކުރެވޭނެ ކަމަކީ ރާއްޖޭގައި އިތުރު ވިޔަފާރިތަކަށް ފުރުސަތު ހުޅުވާލައި، އިތުރު ވިޔަފާރިތައް ތަރައްގީ ކުރުން ކަމަށެވެ.