އަޖޭގެ މަންމައަށް ކާޖޮލް ކިޔަނީ އާންޓީ

ބޮލީވުޑްގެ މަޝްހޫރު އަދި ގިނަބައެއްގެ ލޯބި ލިބިފައިވާ އެއް ޖޯޑަކީ އަޖޭ ދޭވްގަންއާއި ކާޖޮލްގެ ޖޯޑެވެ.

ދާދިފަހުން ޓްވިންކަލް ކަންނާއެކު ބައިވެރިވި ޓޯކް ޝޯއެއްގައި ކާޖޮލް ވަނީ ހަޔާތުގެ ބައެއް ވާހަކަތައް ހިއްސާކޮށްފައެވެ. އެގޮތުން ކާޖޮލްބުނީ އޭނާ އަޖޭ މަންމައަށް މަންމަ ނުކިޔާ ކަމަށެވެ. އަދި އެކަމާ އަޖޭގެ މަންމަ ވީނާ ދޭވްގަން ދުވަހަކުވެސް މައްސަލައެއް ވެސް ނުޖައްސާކަމަށެވެ.

ކާޖޮލް ބުނީ މަންމަ ކިޔާ މުހާތަބުކުރަން ވީނާ ދުވަހުވެސް މަޖުބޫރު ނުކުރާކަމަށާއި ރައްޓެހިން ކުރިމަތީގައިވެސް އެކަމަށް މަޖުބޫރު ނުކުރާކަމަށެވެ. ބައެއްފަހަރު ވީނާގެ ރައްޓެހިން ގެއަށް އައިސް ކާޖޮލް ވީނާއަށް މަންމަ ނުކިޔާތީ ސުވާލުވެސް ކުރާކަމަށާއި އެހާލަތުގައިވެސް ވީނާ ކާޖޮލް ގޯސްނުކުރާކަމަށެވެ.

މި ދެތަރިންގެ ކައިވެނީގެ ކުރީކޮޅު އެންމެ ގަދަޔަށް ދެކެވުނު ވާހަކައަކީ އެދެމީހުންގެ ގުޅުމަށް އަޖޭ މައިންބަފައިން ގަބޫލް ނޫންކަމުގެ ވާހަކައެވެ. ނަމަވެސް ކާޖޮލްގެ އިންޓަވިއުގައި ދެއްކި ވާހަކައިން އެފަދަ އެއްވެސް ކަމެއް ފާހަގަވެފައެއް ނުވެއެވެ.

މި ދެތަރިން ކައިވެނި ކުރީ 24 ފެބްރުއަރީ 1999 ގައެވެ. އެއީ ކާޖޮލް އަދި އަޖޭގެވެސް ފިލްމީ ހަޔާތުގެ އެންމެ ރަންޒަމާނެވެ.