އެމްޓީސީސީން މީހުން ތަމްރީނު ކުރަން ޔޫތް މިނިސްޓްރީއާއެކު އެއްބަސްވެއްޖެ

މޯލްޑިވްސް ޓްރާންސްޕޯޓް އެންޑް ކޮންސްޓްރެކްޓިން ކޮންޕެނީ (އެމްޓީސީސީ)ގެ "ހުނަވަރު" ޓެކްނިކަލް ސްކިލްސް ޕްރޮގްރާމްގެ ދަށުން މީހުން ތަމްރީން ކުރަން އެމްޓީސީސީން، މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމެންޓާއެކު އެއްބަސްވެއްޖެ އެވެ.

އެމްޓީސީސީގެ ސީއީއޯ އާދަމް އާޒިމް ވިދާޅުވީ "ހުނަވަރު" ޕްރޮގްރާމަކީ ތަމްރީނާއި، ތަޖުރިބާ ލިބިފައިވާ މަސައްކަތްތެރި މުވައްޒަފުން އެމްޓީސީސީގެ ވަޒީފާތަކަށް ހޯދުމުގެ ޕްރޮގްރާމެއް ކަމަށާއި މި އަހަރުން ފެށިގެން ތިން އަހަރުގެ މުއްދަތަކަށް އެ ޕްރޮގްރާމް ކުރިއަށް ގެންދާނެ ކަމަށެވެ.

އެ ކުންފުނީގެ އަމާޒަކީ ތިން އަހަރުން 100 މީހުން ތަމްރީން ކުރުން ކަމަށެވެ. އެ ތަމްރީންތަކުގައި ހަ މަސްދުވަސް ހޭދަކުރަން ޖެހޭނެ އެވެ. ކޮންމެ މަހަކު 3000 ރުފިޔާގެ އެލެވެންސެން ދޭނެ އެވެ.

"ހުނަވަރު" ޕްރޮގްރާމްގައި ވެލްޑިންގް އާއި ޕްލަމްބަރިން އާއި އިލެކްޓްރިކް މަސައްކަތް، އޮޓޮމޯޓިވް މެކޭނިކް މަސައްކަތް، ވަޑާން ކުރުން އަދި ކޮންސްޓްރަކްޝަން ސައިޓް ސުޕަވައިޒް ކުރަން މީހުން ތަމްރީން ކުރާނެ ކަމަށް އެ ކުންފުނިން ބުނެއެވެ.