ތެލުގެ އިމްޕޯޓް އިތުރުވެ ބިލިއަނަކާ ގާތަށް، 118 ޕަސެންޓުގެ އިތުރުވުމެއް

ކޮވިޑްގެ ސަބަބުން އަޑިއަޅާލި އިގްތިސާދު އަލުން ކޮޅަށް ޖެހި ހަމައަކަށް އެޅެމުންދާއިރު ތެލުގެ އިމްޕޯޓް ބޮޑުތަނުން އިތުރުވެ 62 މިލިއަން ޑޮލަރަށް އަރާ 1 ބިލިއަން ރުފިޔާއާ ގާތަށް ޖެހިލައިފި އެވެ.

ގާތްގަނޑަކަށް 957 މިލިއަން ރުފިޔާއަށް ތެލުގެ އިމްޕޯޓް އަރާފައިވާއިރު އެމްއެމްއޭއިން ހާމަކުރާގޮތުގައި ކޮވިޑަށްފަހު ރާއްޖެއަށް މުދާ އެތެރެ ކުރާވަރު ދަނީ ބޮޑު ތަނުން މަތިވަމުންނެވެ. އަދި އިމްޕޯޓް މަތިވަމުންދާ މިދަނޑިވަޅުގައި އިމްޕޯޓު އިތުރުވާ ވަރަކަށް އިމްޕޯޓުން ލިބޭ އާމްދަނީ ވެސް ދަނީ އިތުރުވަމުންނެވެ.

އެއާއެކު މިދިޔަ އަހަރުގެ މި މުއްދަތާ އަޅާބަލާއިރު ތެޔޮ އިމްޕޯޓްކުރި މިންވަރު 62.2 މިލިއަން ޑޮލަރަށް ވަނީ އަރާފަ އެވެ. އެއީ 118 ޕަސެންޓުގެ އިތުރުވުމެކެވެ. އެއީ ކާބޯ ތަކެއްޗާއި ތެލުގެ ބާވަތްތައް އަދި ޓްރާންސްޕޯޓުގައި ބޭނުން ކުރާ އިކްއިޕްމަންޓްތަކުގެ ސްޕެއާ އެތެރެ ކުރި މިންވަރެވެ.

ބައެއް ބާވަތްތަކުން އިމްޕޯޓް މަތިވިނަމަވެސް ކެމިކަލް ސާމާނު އެތެރެކުރި މިންވަރު ވަނީ 40 ޕަސެންޓް ދަށްވެފަ އެވެ. އަދި ޕްލާސްޓިކް ސާމާނުގެ އިމްޕޯޓް ވަނީ 19 ޕަސެންޓަށް ވެއްޓިފަ އެވެ. އެހެންނަމަވެސް ތިންވަނަ ކުއާޓަރުގައި ރާއްޖޭގެ ޖުމްލަ އިމްޕޯޓް ވަނީ 62 ޕަސެންޓް މަތިވެފައިކަމަށް އެމްއެމްއޭއިން ހާމަކޮށްފައިވެ އެވެ.