ކުނިން ހަކަތަ އުފައްދާ ޕްލާންޓް ގާއިމުކުރުމަށް ލޯނެއް ނަގައިފި

ރާއްޖޭގައި އަލަށް ގާއިމުކުރާ ކުނިން ހަކަތަ އުފައްދާ ޕްލާންޓެއް ތަރައްގީކުރުމަށް އަބޫދާބީ ފަންޑުން 14 މިލިއަން ޑޮލަރުގެ ލޯނެއް ރާއްޖެއިން ނަގައިފިއެވެ.

ލޯނު ދޫކުރުމުގެ އެއްބަސްވުމުގައި އާބޫދާބީ ފަންޑާއި، ދިވެހި ސަރުކާރާ ދެމެދު ވަނީ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރ އިބްރާހިމް އަމީރެވެ.

މި މަޝްރޫއުގެ ދަށުން ކުނިން 10 އިންސައްތަ ކުޑަކުރުމަށާއި، 6000 ގޭބިސީއަށް ކަރަންޓު ފޯރުކޮށްދިނުމަށާއި، ދެމެހެއްޓެނިވި އިގްތިސާދީ ތަރައްގީ ރާއްޖޭގައި ކުރިއެރުވުމަށް އެހީތެރިވެދޭނެ ކަމަށް އެ ފަންޑުން ބުނެއެވެ.

Sincere gratitude to #ADFD for been a long-standing development partner for the Maldives. Several key projects have been financed & are ongoing with the assistance of the fund. This project is expected to create over 100 jobs & contribute towards our carbon neutrality goals. https://t.co/b55GLPM1kE

— Ibrahim Ameer (@iameeru) December 13, 2021

އަބޫދާބީ ފަންޑުން މި މަޝްރޫއަށް އެހީވުމަށް ލޯނެއް ދޫކުރަން ނިންމުމާއެކު ފިނޭންސް މިނިސްޓަރ އިބްރާހިމް އަމީރު ވަނީ އަބޫދާބީ ފަންޑުން މިފަދަ މަޝްރޫއުތަކަށް އެހީވުމުގައި ދެމިއޮންނަކަމަށްޓަކައި ޝުކުރު އަދާކުރައްވާފައެވެ. އަބޫދާބީ ފަންޑުން އެހީތެރިކަން ފޯރުކޮށްދީފައިވާ ގިނަ ޕްރޮޖެކްޓުތަކެއްގެ މަސައްކަތް މިހާރުވެސް ކުރިއަށްދާކަމަށް މިނިސްޓަރ އަމީރު ވިދާޅުވިއެވެ.

ފަންޑުގެ އެހީގައި މުހިންމު ގިނަ މަޝްރޫއުތަކެއް ދަނީ ހިންގަމުން އަންނަ ކަން ފާހަގަކުރައްވާ މިނިސްޓަރު އަމީރު ވިދާޅުވީ މި މަޝްރޫއުގެ ސަބަބުން 100 އަށްވުރެ ގިނަ ވަޒީފާ އުފެދިގެންދާނެ ކަމަށް ލަފާކުރެވޭ ކަމަށެވެ.