އިންޑޮނޭޝިއާއަށް އައި ބިންހެލުމުގެ ނުރައްކާ ރާއްޖެއަކަށް ނެތް

އިންޑޮނޭޝިއާގެ ޕްލޯރެސް އައިލެންޑް ކައިރިން ޕްލޯރެސް ސީއަށް 7.3 މެނިޓިއުޑްގެ ބިން ހެލުމެއް އަތުވެއްޖެއެވެ. ނަމަވެސް މި ބިންހެލުމުގެ އަސަރެއް ރާއްޖެއަކަށް ނުކުރާނެ ކަމަށް މޫސުމާ ބެހޭ ގައުމީ އިދާރާއިން ބުނެ އެވެ.

އިންޑޮނޭޝިއާ އަށް ބިންހެލުން އައިސްފައިވަނީ އެ ގައުމުގެ ގަޑިން މިއަދު ހެނދުނު 10:20 ހާއިރު އެވެ. ބިންހެލުން އައިސްފައިވަނީ ކަނޑުގެ 18.5 ކިލޯމީޓަރު އަޑިންނެވެ.

ބިންހެލުމާ ގުޅިގެން ޕެސިފިކް ސުނާމީ ވޯނިން ސެންޓަރުން ނެރުނު އިންޒާރުގައި ބުނެފައިވަނީ ބިން ހެލުން އައި ހިސާބާ 1،000 ކިލޯމީޓަރު ކައިރީގައިވާ ސަރަހައްދުތަކަށް ސުނާމީގެ ނުރައްކާތެރި ރާޅުގެ އަސަރު ކުރުން އެކަށީގެންވާ ކަމަށެވެ.

މެޓް އޮފީހުން މިއަދު ހެނދުނު ބުނީ ބިންހެލުމުގެ އަސަރު ރާއްޖެއަށް ކުރާނެ ކަމަށް ނުފެންނަ ކަމަށެވެ. އެއީ ބިންހެލުން އައީ ރާއްޖެއާއި 5،564 ކިލޯ މީޓަރު ދުރަށް ކަމަށް ވާތީ އެވެ.