ކުމުންދޫގައި ކަނބަލުންގެ މަސައްކަތުން ހިތްގައިމު މައިޒާނެއް

ހދ. ކުމުންދޫ އުތުރު އަވަށު އަންހެން ކަނބަލުން އިސްނަގައިގެން ތަރައްގީ ކުރި ޕާކް ހުޅުވައިފި އެވެ. ރަށުގެ ރައްޔިތުންނަށާއި ރަށުން ބޭރުން ދަތުރު އަންނަ ފަރާތްތަކުން ބޭނުން ކުރުމުގެ މަގުސަދުގައި ހެދި "ހިތްފަހި" ޕާކް ތަރައްގީކޮށްފައިވަނީ ރަށުގެ އުތުރުކޮޅު ދޯނިމަގުގަ އެވެ.

ޕާކާބެހޭގޮތުން މައުލޫމާތު ދެއްވަމުން ކުމުންދޫ ކައުންސިލްގެ ރައީސް އަމީން މުހައްމަދު ވިދާޅުވީ މި ޕާކަކީ އެ އަވަށު ކަނބަލުން އިސްނަގައިގެން ހެޔޮ އެދޭ ފަރާތްތަކުގެ ދީލަތި އެހީއާއި އެކަމުގައި ހަރަކާތްތެރިވި ކަނބަލުންގެ އިތުރުން އެސަރަހައްދުގެ ފިރިހެންވެރިންގެވެސް ވަރަށް ބޮޑު އެހީއަކާއެކު ތަރައްގީ ކުރި ޕާކެއް ކަމަށެވެ.

ކުމުންދޫގައި ތަރައްގީ ކުރެވިގެންދިޔަ 7 ވަނަ ޕާކްކަން ފާހަގަ ކުރައްވަމުން އަމީން ވިދާޅުވީ ރަށުންނާއި ކައިރި ރަށްތަކުން ދަތުރު އަންނަ ފަރާތަކާއި ޕާކްތަކުގެ ބޭނުންކުރާ އެންމެހާ ފަރާތްތަކުން ތަނުގެ ސާފުތާހިރުކަމަށް ބަލެމަށާއި އެތަނުގައި ހެދިފައިވާ ތަކެއްޗަށް ގެއްލުންނުދީ ގިނަދުވަހު ބޭނުންކުރެވޭނެހެން ތަކެތި ބޭނުން ކުރުމަށެވެ.

އޭނާ ވިދާޅުވީ ޕާކުގައި 4 ހަޓާއި، އުނދޯލިގެ، މިސްކިތުގެ އިތުރުން ބާބަކިއު ގްރިލްތަކެއްގެ އިތުރުން ބަދިގެއްއެއް ހުންނާނެ ކަމަށެވެ. މި މައިޒާން ތަރައްގީކޮށް ފައިވަނީ އިއާދަކުރަނިވި ހަކަތައިން ދިއްލޭ ލައިޓް ހަރުކޮށް ރޭގަނޑުވެސް ބޭނުން ކުރެވޭ ގޮތަށްކަމަށެވެ.

މި މަސައްކަތުގައި އިސްކޮށް އުޅު ފަރާތެއް ކޭއޯއާ ވާހަކަ ދައްކަމުން ބުނީ މި މައިޒާނަކީ ދީލަތި އެތައް ފަރާތްތަކެއްގެ އެހީއާއެކު ތަރައްގީކުރެވުނު މައިޒާނެއް ކަމަށެވެ. އަދި މިތަނުގައި ހަރުކުރެވިފައިވާ ސޯލާ ލައިޓަކީ މަކުނުދޫ ދާއިރާގެ މަޖިލިސް މެމްބަރު މުހައްމަދު ރާއީ ހަދިޔާކުރއަވާފައިވާ ތަކެތި ކަމަށެވެ.

އަހަރެއްހާ ދުވަސްކުރިން ފެށި މި މަސައްކަތް އެކި އެކި ސަބަބުތަކާހުރެ ނުނިމި ގިނަދުވަސްތަކެއް ވުމަށްފަހު ނިންމާ ހުޅުވާފައިވަނީ މިދިޔަ ހޮނިހިރު ދުވަހު އެ ސަރަހައްދުގައި އެކަމަށްތަކައި ބޭއްވި ކުޑަ ހަފްލާއެއްގަ އެވެ.