ޗުއްޓީއާ ދިމާކޮށް އޮމިކްރޯން އިތުރަށް ފެތުރިދާނެކަމުގެ އިންޒާރު ޑަބްލިއުއެޗްއޯއިން ދީފި

މި ޗުއްޓީއާއި ދިމާކޮށް އޮމިކްރޯން ވޭރިއަންޓް އިތުރަށް ފެތުރިދާނެކަމުގެ ބިރު އޮތުމުން ޗުއްޓީއަށް ކޮށްފައިވާ ޕްލޭންތައް ކެންސަލް ކުރުމަށް ވޯލްޑް ހެލްތް އޮގަނައިޒޭޝަން (ޑަބްލިއުއެޗްއޯ) އިން އިލްތިމާސްކޮށްފި އެވެ.

ޑަބްލިއުއެޗްއޯގެ ހެޑް ޑރ ޓެޑްރޮސް ބުނީ މިހާރު ފެންނަ ހެކިތަކަށް ބަލާ ޑެލްޓާ ވޭރިއަންޓަށް ވުރެ ހަލުވިކޮށް އޮމިކްރޯން ވޭރިއަންޓް ފެތުރެމުންދާކަމަށެވެ.

މި ވޭރިއަންޓާއި ގުޅިގެން ފަރަންސޭސިވިލާފާ، ޖަރުމަނުން ވަނީ ހަރުކަށި ފިޔަވަޅުތަކެއް އަޅާފައެވެ. އަދި ކްރިސްމަސް ބަންދާ ދިމާކޮށް ނެދަލެންޑުންވަނީ ވަރަށް ވަރުގަދަ ލޮކްޑަކަށްވެސް ގޮސްފައެވެ.

މީގެ އިތުރުން ބަންދާ ދިމާކޮށް އެމެރިކާއިން ލޮކްޑައުންއަކަށް ގޮސްދާނެކަމުގެ އިޝާރާތެއް ވައިޓްހައުސްއިން ވަނީ ދީފައެވެ. އެގަމުގެ އެންމެ މޮޅު އެއް އިންފެކްޓިއަސް ޑިސީޒް އެކްޕާޓް ޑރ އެންތޮނީ ފައުސީ ވަނީ ކްރިސްމަސް ބަންދާ ދިމާކޮށް ދަތުރުފަތުރު ކުރުން އިތުރު ވެއްޖެނަމަ އޮމިކްރޯން އިތުރުވެގެންދާނެ ކަމުގެ އިންޒާރު ދީފައެވެ. އަދި ވެކްސިން ފުރިހަމަކޮށްގެން ތިބި ފަރާތްތަކަށްވެސް މި ވެރިއެންޓް އަސަރު ކުރާނެ ކަމަށް އޭނާ ވިދާޅުވި އެވެ.

އޮމިކްރޯން ވޭރިއަންޓްވަނީ މިހާތަނަށް ފެނުނު ކޮވިޑްގެ ވޭރިއަންޓްތަކުގެ ތެރެއިން އެންމެ ނުރައްކާ ވޭރިއަންޓްގެ ގޮތުގައި ޑަބްލިއުއެޗްއޯއިން ކަނޑައަޅާފައެވެ.