ކުރިއަށް އޮތް ތިން ހަފްތާގައި ކޮވިޑް ކޭސްތައް އިތުރުވެދާނެ: ރައީސް

ކުރިއަށް އޮތް ތިން ހަފްތާއެއްހާ ދުވަހު، ކޮވިޑް-19 ކޭސްތައް ރާއްޖޭގައި އިތުރުވުމުގެ ފުރުސަތު އެބައޮތް ކަމަށް ސިއްހީ ތަޖުރިބާކާރުން ބުނެފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރައީސް ވަނީ ކޮވިޑާ ގުޅިގެން އަޅައިފައިވާ ފިޔަވަޅުތަކަށް ސަމާލުވުމަށް އިލްތިމާސް ކުރައްވާފައެވެ. ނ. ލަންދޫ ބަނދަރު ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ކޮވިޑްގެ އާލަމީ ވަބާއިން ސަލާމަތް ވުމުގެ އުންމީދަކާ ހަމައަށް ދިވެހިންނަށް މިހާރު އާދެވިފައިވާ ކަމަށެވެ.

އަދި ފާއިތުވީ ދެ އަހަރަކީ ރާއްޖޭގައި ތާރީހު ލިޔެވެން ފެށި ފަހުން ދިމާވި އެންމެ ހައްސާސް ދެ އަހަރު ކަމަށާއި އަލަށް ފެތުރެމުން އަންނަ ކޮވިޑް ވޭރިއަންޓުގެ ބިރު ރާއްޖެއަށްވެސް އެބަ އޮތްކަމަށް ރައީސް ވިދާޅުވި އެވެ.

އާ ވޭރިއަންޓާ ގުޅިގެން ޓެގް ޓީމާއެކު އިއްޔެ މަޝްވަރާތައް ކުރެވުނު ކަމަށް ރައީސް ވިދާޅުވިއެވެ. އެގޮތުން ކުރިއަށް އޮތްތަނުގައި ހާލަތު ގޯސްވެދާނެ ކަމުގެ ފުރުސަތު އޮތް ކަން ރައީސް ފާހަގަކުރެއްވިއެވެ.