ބައެއް ޕްރޮޖެކްޓްތަކުގެ އެޑްވާންސަށް އިންޑިއާއިން 5.49 މިލިއަން ރުފިޔާ ދީފި

ރާއްޖޭގެ ހަތް އަތޮޅެއްގެ އަށް ރަށެއްގައި ކުރިއަށް ގެންދަން ހަމަޖެހިފައިވާ ހައި އިމްޕެކްޓް ގްރާންޓް ޕްރޮޖެކްޓްގެ މޮބިލައިޒޭޝަން މަސައްކަތް ފެށުމަށް 5.49 މިލިއަން ރުފިޔާ އިންޑިއާއިން ދޫކޮށްފިއެވެ.

މި މަޝްރޫއުތަކަށް 36.5 މިލިއަން ރުފިޔާ ހަރަދުވާނެއެވެ. މި މަޝަރޫއުތައް ހިންގުމަށް ބޭނުންވާ އެމްއޯޔޫތައް ވަނީ މިދިޔަ އަހަރުގެ އޮކްޓޯބަރު މަހުގެ ތެރޭގައި ނިންމާލާފައެވެ. އެ މަޝްރޫއުތަކުގެ ތެރޭގައި ތ. ތިމަރަފުއްޓާއި އެ އަތޮޅު ވޭމަންޑޫގައި މަގުބައްތި ޖެހުމުގެ މަސައްކަތް ހިމެނެއެވެ.

އެޑްވާންސްގެ ތެރޭގައި އެމްއެންޑީއެފްއަށް ބޭނުންވާ ސީ އެމްބިއުލެންސް ހޯދުމާއި، މާލޭގެ އޮލިމްޕަސް ތިއޭޓަރު އަޕްގްރޭޑް ކުރުމުގެ މަސައްކަތް ކުރަން ބޭނުންވަ ފައިސާވެސް ހިމެނެއެވެ.

އަދި ލ. މާބައިދޫގައި އައިސް ޕްލާންޓް ގާއިމް ކުރުމާއި އދ. ދަނގެތީގައި ކަލްޗަރަލް ސެންޓަރެއް އިމާރާތް ކުރުމަށް ބޭނުންވާ ފައިސާ ވެސް އޭގެތެރޭގައި ހިމެނެއެވެ.

ނ. މިލަދޫ ކައުންސިލް އިމާރާތް ބިނާކުރުމާއި ގދ. ތިނަދޫ އަބޫބަކުރު ސްކޫލް، ލ. ގަން އިހައްދޫ ސްކޫލް އަދި ހއ. އަތޮޅު ތައުލީމީ މަރުކަޒުގައި އިންކްލޫސިވް އެޑިޔުކޭޝަން ސަޕޯޓް ޔުނިޓް ގާއިމްކުރަން ބޭނުންވާ ފައިސާ ވެސް އޭގެތެރޭގައި ހިމެނެއެވެ.