ރާއްޖެއިން އިތުރު 1،697 މީހަކު ކޮވިޑަށް ޕޮޒިޓިވްވެއްޖެ

ފާއިތުވީ 24 ގަޑިއިރު ތެރޭގައި ރާއްޖެއިން ޓެސްޓްކުރި 7،263 ސާމްޕަލްގެ ތެރެއިން 1697 މީހަކުން ކޮވިޑަށް ޕޮޒިޓިވް ވެއްޖެއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ތަފާސް ހިސާބުތަކުން ދައްކާ ގޮތުގައި އެންމެ ފަހުން ޕޮޒިޓިވްވެފައިވާ މީހުންގެ ތެރެއިން 677 މީހުން ޕޮޒިޓިވްވެފައިވަނީ މާލެ ސަރަހައްދުންނެވެ. އަދި 680 މީހަކު އަތޮޅު ތެރޭގެ ރަށްތަކުން ޕޮޒިޓިވްވެފައިވާއިރު ، 60 މީހަކު ޕޮޒިޓިވްވެފައިވަނީ ރިސޯޓުތަކުންނެވެ.

މިހާތަނަށް ރާއްޖެ އިން ކޮވިޑް ޖެހުނު މީހުންގެ ޖުމްލަ އަދަދު ވަނީ 112،628އަށް އަރާފައެވެ.

އެކްޓިވް ކޭސްތައް، 11،535 ގައި ހުރިއިރު އޭގެ ތެރެއިން ހޮސްޕިޓަލްގައި އެނދުމަތިކޮށްގެން 49 މީހަކަށް އަންނަނީ ފަރުވާ ދެމުންނެވެ.

ކޮވިޑް ޖެހިގެން ރާއްޖެއިން މިހާތަނަށް މަރުވެފައިވަނީ 269 މީހުންނެވެ.

ދުނިޔޭގެ އެކި ގައުމު ތަކުގައި ހަލުވި ކަމާއެކު ފެތުރެމުން އަންނަ ކޮވިޑްގެ އާ ވޭރިއެންޓް، "އޮމިކްރޯން" ރާއްޖެއިން ވެސް މިހާރު ވަނީ ފެނިފައެވެ.