މިނިމަމް ވޭޖް ތަންފީޒުކޮށް ފެނަކަ މުވައްޒަފުންނަށް ހިނިތުންވުން

އެންމެކުޑަ އުޖޫރަ ތަންފީޒުކޮށް ފެށުމާއެކު ފެނަކައިގެ މުވައްޒަފުންނަށް ހިނިތުންވުން ގެނެސްދީފި އެވެ. އެގޮތުން ކުންފުނީގެ 3346 މުވައްޒަފަކަށް މުސާރަ ބޮޑުކޮށްފައިވާ ކަމަށް އެކުންފުނިން ބުނެފި އެވެ.

އެ ކުންފުނިން އާންމުކުރި ހިސާބުތަކުން ފެންނަ ގޮތުގައި ކުރިން އަސާސީ މުސާރައިގެ ގޮތުގައި 2،800 ރުފިޔާ ލިބުނު މުވައްޒަފަކަށް މިހާރު 4،650 އަސާސީ މުސާރައިގެ ގޮތުގައި ލިބޭނެއެވެ. އެލަވަންސްތައް ހިމަނައިގެން މިއީ 5،590 ރުފިޔާއިން 9،222 ރުފިޔާއަށް މައްޗަށް ޖެހިލުމެކެވެ.

ޤާނޫން ނަންބަރު 02/2008 (ވަޒީފާއާބެހޭ ޤާނޫނު) ގެ ދަށުން، 2021 ނޮވެމްބަރ 08 ވަނަ ދުވަހު މިނިސްޓަރ އޮފް އިކޮނޮމިކް ޑިވެލޮޕްމަންޓް ނެރުއްވި “އެންމެ ކުޑަމިނުން ދެވޭނެ އުޖޫރަ ކަނޑައެޅުމުގެ ޢަމުރު” މި ކުންފުނިން ވަނީ ތަންފީޒުކޮށްފައި. pic.twitter.com/h3wMtmBFuW

— Fenaka Corporation Ltd (@TeamFenaka) February 1, 2022

މިދިޔަ އަހަރު ފާސްކުރެވުނު މިނިމަމް ވޭޖުގެ ގާނޫނާއެކު ސަރުކާރުން މިނިމަމް ވޭޖެއް ކަނޑައަޅާ، އަދަދުތައް ހާމަކުރީ މިދިޔަ ނޮވެންބަރު މަހުގެ ތެރޭގައެވެ. އޭރު އިކޮނޮމިކް މިނިސްޓްރީން ނެރުނު ގަރާރުގައި ވާގޮތުން މި ޖެނުއަރީ މަހުގެ މުސާރަ ދޭން ޖެހޭނީ އެ ގަރާރާ އެއްގޮތަށެވެ.

މިނިމަމް ވޭޖު ތަންފީޒުވުމުން ކުދި ވިޔަފާރިތަކުގެ މުވައްޒަފުންނަށް މަހަކު މަދުވެގެން 4،500 ރުފިޔާ ދޭން ޖެހެއެވެ. މެދު ފަންތީގެ ވިޔަފާރިތަކުން ދޭންޖެހެނީ 7،000 ރުފިޔާއެވެ. މިއީ ޕަބްލިކް ސެކްޓާގެ މުވައްޒަފުންނަށް ވެސް ލިބޭ މިންވަރެވެ. އަދި، ބޮޑެތި ވިޔަފާރިތަކުން މަހަކު 8،000 ރުފިޔާ މުވައްޒަފުންނަށް މުސާރައިގެ ގޮތުގައި ދޭންޖެހެއެވެ.