ޔޫކްރެއިންގައި ތިބި ދިވެހީން ރާއްޖެ ގެންނަން ރައީސް އަންގަވައިފި

ޔޫކްރެއިންގައި ތިބި ދިވެހީން ރާއްޖެ ގެނައުމަށް ރައީސް އިބްރާހީމް މުހައްމަދު ސޯލިހް މިއަދު އަންގައިފިއެވެ.

ހަނގުރާމައިގެ ބިރުވެރިކަން ބޮޑުވެފައިވާ ޔޫކްރެއިންގައި 50 ދިވެހިން ތިބިއިރު އޭގެ ތެރެއިން 29 ދަރިވަރުން ތިބީ ހަނގުރާމަ ފަށައިފިނަމަ އެންމެ ނުރައްކާވާނެ ހިސާބުގައެވެ.

ރައީސް އޮފީހުގެ ތަރުޖަމާން މުޙައްމަދު މަބްރޫކް އަޒީޒް މިއަދު ވިދާޅުވީ ޔޫކްރެއިންގައި ދިރިއުޅޭ ދިވެހިން ރާއްޖެއަށް އަނބުރާ ގެނައުމަށް ރައީސް އެންގެވުމާ ގުޅިގެން ފޮރިން މިނިސްޓްރީން އެ މަސައްކަތް ފައްޓާފައިވާ ކަމަށެވެ.

ޚަރްވިކްގައި ތިބި ކުދިން ކިޔަވާ ކޮލްޖެކުގެ ކިޔެވުން އޮންލައިންކޮށް ބަދަލުކުރުމުން އޭގެ ތެރެއިން ބައެއް ދަރިވަރުން މާދަމާ ރާއްޖެ އައުމަށް ފުރަން ވަނީ ނިންމައިފައެވެ. ޚަރްވިކް އަކީ ރަޝިޔާގެ ބޯޑަރާއި އެންމެ ކައިރީގައި އޮންނަ ސިޓީއެވެ.

ރައީސްގެ އެންގުމާ ގުޅޭގޮތުން ފޮރިން މިނިސްޓްރީން ބުނީ ޔޫކްރެއިންގައި ތިބި ދަރިވަރުންގެ ތެރެއިން ރާއްޖެ އަންނަން ބޭނުންވާ ކުދިންނަށް އެހީތެރިކަން ފޯރުކޮށްދެމުން އަންނަ ކަމަށެވެ. އެގޮތުން ރާއްޖެ އަންނަން ބޭނުންވާ ދަރިވަރުން ޓިކެޓް ނެގުމަށް ފައިސާގެ އެހީތެރިކަން ފޯރުކޮށްދޭން ނިންމާފައިވާ ކަމަށް ބުންޏެވެ.

މި ކަމާ ގުޅިގެން ރާއްޖޭގެ ފޮރިން މިނިސްޓްރީން ބުނީ ޔޫކްރެއިނާއި ރަޝިއާގައި ހިނގަމުން އަންނަ ކަންކަން ވަރަށް ގާތުން ބަލަމުންދާ ކަމަށާއި ޔޫކްރެއިންގައި ތިބި ދަރިވަރުންނާ ވާހަކަ ދައްކާ ކަމަށެވެ.