ސިއްހީ ކުއްލި ނުރައްކަލުގެ ހާލަތު އުވާލައިފި

ކޮވިޑާ ގުޅިގެން އިއުލާން ކުރަމުން އައި އާންމު ސިއްހަތުގެ ކުއްލި ނުރައްކަލުގެ ހާލަތު މިރެއިން ފެށިގެން އުވާލަން ނިންމާފައިވާ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

ދައުލަތުގެ މީޑިއާ މެދުވެރިކޮށް ރައްޔިތުންނާ މުހާތަބު ކުރައްވަމުން ރައީސް ވިދާޅުވީ މިރެއިން ފެށިފެން ސިއްހީ ކުއްލި ނުރައްކަލުގެ ހާލަތު ނިމުމަކަށް ގެންނައި އިރު މި އަހަރު ތެރޭގައި އިގްތިސޯދީ ގޮތުން އެންމެ ކުރިއަރާނެ 5 ގައުމުގެ ތެރޭގައި ރާއްޖެ ހިމެނިގެން ދިޔައީ ކޮވިޑް ކޮންޓްރޯލްކުރަން ރައްޔިތުން ދިން އެއްބާރުލުމުގެ ސަބަބުންކަމަށް ރައީސް ވިދާޅުވިއެވެ.

އަދި ސިއްހީ ކުއްލި ނުރައްކަލުގެ ހާލަތު ނިމުމަކަށް ގެނައި ކަމުގައި ވިއަސް ކޮވިޑްގައި ހޭދަވި 2 އަހަރު ދުވަހު ކުރި ތަޖުރިބާ ހަނދާން ނައްތައިލައިގެން ނުވާނެކަމަށާއި ކޮވިޑުން ރައްކާތެރިވުމަށް އާދައަކަށް ހެދި ހުރިހާ އާދަތަކެއްގައި އަދިވެސް ހިފެހެއްޓުމަށް ރައީސް ވަނީ އެދިވަޑައިގެންފައެވެ.

ކޮވިޑް-19އިން ރައްކާތެރިވުމަށް ފިޔަވަޅު އެޅުމުގެ ގޮތުން ރާއްޖޭގައި އާންމު ސިއްހަތުގެ ކުއްލި ނުރައްކާ އެންމެ ފުރަތަމަ އިއުލާން ކުރީ 2020 ވަނަ އަހަރުގެ މާޗު މަހުގެ 12ގައެވެ. އެއަށްފަހު ހާލަތުގެ މުއްދަތު އައީ އިތުރުކުރަމުންނެވެ. އެގޮތުން އެންމެ ފަހުން ސިއްހީ ކުއްލި ނުރައްކަލުގެ ހާލަތު އިތުރުކޮށްފައިވަނީ މިދިޔަ ފެބްރުއަރީ މަހު 28 ގަ އެވެ.