އޭސީސީއަށް އައްޔަންކުރަން ފޮނުވި ނަންތަކަށް ފާސްކޮށްފި

އެންޓި ކޮރަޕްޝަން ކޮމިޝަން (އޭސީސީ)ގެ މެންބަރުކަމަށް އައްޔަން ކުރުމަށް ރައީސް އިބްރާހީމް މުޙައްމަދު ޞާލިޙް ރައްޔިތުންގެ މަޖިލީހަށް ފޮނުއްވައިފައިވާ ނަންތަކަށް މަޖިލީހުން މިއަދު ރުހުން ދީފިއެވެ.

އޭސީސީއަށް އައްޔަން ކުރަން ރައީސް ފޮނުވި ނަންތަކުގެ ތެރެއިން އާދަމް ޝާމިލް އާއި ޝަޒްނާ ހާޝިމް އާއި ޝިޔާމާ މުޙައްމަދުގެ ނަން ފާސްކުރީ 42 މެންބަރުންގެ ވޯޓުންނެވެ. އެ ބޭފުޅުން ކޮމިޝަނަށް އައްޔަން ކުރަން ނުފެންނަ ކަމަށް އެއްވެސް މެންބަރަކު ވޯޓު ނުދެއްވައެވެ.

ޢަބްދުއްސަލާމްގެ ނަން 43 ވޯޓުން ފާސްކޮށްފައިވާ އިރު ޠާހާ މުޙައްމަދުގެ ނަން ފާސްކޮށްފައި ވަނީ 40 މެންބަރުންގެ ތާއިދާއެކުއެވެ. ޠާހާ މުޙައްމަދު އޭސީސީއަށް އައްޔަން ނުކުރުމަށް އެއް މެންބަރަކު ވޯޓުދެއްވިއެވެ.

އޭސީސީއަށް އެ މެންބަރުން އައްޔަން ކުރުމަށް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ރުހުން ދިނީ މިދިޔަ ހޯމަ ދުވަހެވެ.

މި އަހަރުގެ ރިޔާސީ ބަޔާން އިއްވަވަމުން ރައީސް ޞާލިޙް ވަނީ އޭސީސީއަށް މެންބަރުން އައްޔަން ކުރެވުމާއެކު، ދަައުލަތުގެ މުދަލާ ފައިސާއަށް ޚިޔާނާތްތެރިވުމާއި ކޮރަޕްޝަންގެ އަމަލުތައް ތަހުގީގު ކުރަމުން އަންނަ އެސެޓް ރިކަވަރީ ކޮމިޝަނުން އެމްއެމްޕީއާރްސީގެ މައްސަލައިގައި ހޯދައިފައިވާ ކަންކަން ކޮމިޝަނަށް ހުށަހަޅުއްވާނެ ކަމަށް ވިދާޅުވެފައެވެ.