ނަންބޯޑު ހަރުނުކޮށް ހުރި ގޯތިތަކުގައި ނަންބޯޑު ހަރުކުރަން އަންގައިފި

ކުޅުދުއްފުށީ ސިޓީގައި ނަން ބޯޑު ހަރުކޮށްފައިނުވާ ގޯތިތަކުގައި، ގޯތިދޫކުރުމުގެ އުސޫލުގައިވާ ގޮތަށް ގޯތީގެ ނަންބޯޑު ހަރުކުރުމަށް ސިޓީ ކައުންސިލުން އަންގައިފި އެވެ.

ސިޓީ ކައުންސިލުން ކުރި އިއުލާނެއްގައި ބުނީ ނަން ބޯޑު ހަރުކޮށްފައިނުވާ ގޯތިތަކުގައި އަންނަ އޮގަސްޓް މަހުގެ ނިޔަލަށް ނަންބޯޑު ހަރުކުރަންވާނެ ކަމަށެވެ.

ކައުންސިލުން އިތުރަށް ބުނީ މޯލްޑިވްސް ބިއުރޯ އޮފް ސްޓެޓިސްޓިކްސްއިން ކުރިއަށް ގެންދާ ބޯހިމެނުމުގެ މަސައްކަތް 17 ސެޕްޓެންބަރު 2022 ވަނަ ދުވަހުން ފެށިގެން ކުރުމަށް ވަނީ ހަމަޖެހިފަ ކަމަށާއި މި މަސައްކަތުގައި އާބާދީއާއި ދިރިއުޅޭ ތަންތަނުގެ ތަފާސްހިސާބު ބެލުމަށް، ގޭގެއަށް ޒިޔާރަތް ކުރަމުން ގެންދާއިރު ގޯތިތައް ދެނެގަތުމަށްޓަކައި ގޯތީގެ ނަން ފަސޭހައިން ކިޔަން އެނގޭނެގޮތަށް ޖަހާފައި ހުރިކަން ކަށަވަރުކުރަންޖެހޭކަމަށެވެ.

އަދި ގޯތީގެ ނަން ބޯޑު ހަރުކުރާއިރު، ރަޖިސްޓަރީކޮށްފައިވާ ނަން ޖެހުމަށް ސަމާލުކަންދޭންވާނެކަމަށާއި ގޯތީގެ ނަންޖެހުމުގައި ރަޖިސްޓަރީ ކޮށްފައިނުވާ ނަމެއް ނުވަތަ ރަޖިސްޓަރީގައިވާ ނަމަށް ނަންބަރެއް އިތުރުކޮށް ޖެހުމަކީ މަނާކަމެއް ކަމުގަ އެވެ.