ދައުރު ނިމޭއިރު މުޅި ރާއްޖޭގައި 68 މެގަވޯޓްގެ ސޯލާ އިތުރުކުރެވޭނެ

މި ސަރުކާރުގެ ދައުރު ނިމޭއިރު މުޅި ރާއްޖޭގައި 68.30 މެގަވޮޓްގެ ސޯލަރ އިތުރުކުރެވޭނެކަމަށް މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޮލަޖީ އައިމިނަތު ޝައުނާ ވިދާޅުވެއެވެ.

މިނިސްޓަރު މިހެން ވިދާޅުވީ ކައުންސިލްތަކަށް އަމާޒުކޮށްގެން ކުރިއަށްގެންދިޔަ ވިއަވަތި ކޮންފަރެންސްގައި އިޔާދަކުރަނިވި ހަކަތަ ބޭނުންކުރުމުގެ މުހިންމު ކަމުގެ މައްޗަށް އަލި އަޅުވާ ލައްވައި ވާހަކަ ދައްކަވަމުންނެވެ.

އެގޮތުން މިއހަރު ނިމޭއިރު 41.50 މެގަވޮޓުގެ ސޯލަރ އިތުރު ކުރެވޭނެށާއި މި ސަރުކާގެ ދައުރު ނިމޭއިރު ޖުމުލަ 68.30 މެގަވޮޓުގެ ސޯލަރ އިންސްޓޯލްކޮށް ބޭނުން ކުރެވޭނެކަމަށް މިނިސްޓަރ ވިދާޅުވިއެވެ.

މި ސަރުކާރު ވެރިކަމާ ހަވާލުވިއިރު ރާއްޖޭގައި އިންސްޓޯލް ކޮށްފައި އޮތީ 16 މެގަވޮޓްގެ ސޯލަރ އެނާޖީކަމަށާއި މި ސަރުކާރުގެ މިވީ އަހަރުތަކުގައި ޖުމުލަ 36 މެގަވޮޓު ސޯލަރ ހަރުކުރެއްވިއްޖެކަމަށް މިނިސްޓަރ ވިދާޅުވިއެވެ.

ސަރުކާރުން ދަނީ ރާއްޖޭގައި އިއާދަކުރަނިވި ހަކަތަ ބޭނުންކުރާ މިންވަރު އިތުރުކުރުމަށް، ބިޔަ މަޝްރޫއުތަކެއް ފެށުމަށް ތައްޔާރުވަމުންނެވެ. މީގެތެރެއިން ފާހަގަކޮށްލެވޭ އެއް މަޝްރޫއަކީ ރާއްޖޭގެ 6 ސަރަހައްދެއްގައި 11 މެގަވޯޓުގެ ސޯލަރ ޕެނަލް ހަރުކުރުމުގެ މަޝްރޫއެވެ.