ރާއްޖޭގެ 3 ސްކޫލަކަށް އިންޑިޔާއިން 4.6 މިލިއަން ރުފިޔާގެ އެހީ

ރާއްޖޭގެ ތިން ސްކޫލަކަށް އިންޑިއާ ސަރުކާރުން އެހީ ހަމަޖައްސައިދީފި އެވެ. އެހީ ހަމަޖައްސައި ދީފައިވަނީ ހއ. ދިއްދޫގައި ހުންނަ ހއ. އަތޮޅު ތައުލީމީ މަރުކަޒާއި ލ. ގަމުގައި ހުންނަ އިހައްދޫ ސްކޫލުގެ އިތުރުން ގދ. ތިނަދޫގައި ހުންނަ އަބޫބަކުރު ސްކޫލަށެވެ.

މި 3 ސްކޫލަށް އިންޑިޔާގެ ސަރުކާރުން 4.6 މިލިއަން ރުފިޔާގެ އެހީ ފޯރުކޮށްދީފައިވާއިރު މި އެހީ ބޭނުން ކުރަން ހަމަޖެހިފައިވަނީ އެ ސްކޫލްތަކުގައި ހިންގާ އިންކްލޫސިވް އެޑިޔުކޭޝަން ސަޕޯޓް ޔުނިޓްތައް ހަރުދަނާ ކުރުމަށެވެ.

އެގޮތުން އިންކްލޫސިވް އެޑިޔުކޭޝަން ސަޕޯޓް ޔުނިޓްތަކަށް ބޭނުންވާ އިންފްރަސްޓްރަކްޗާ ތަރައްގީކުރުމަށާއި، ބޭނުންވާ ވަސީލަތްތައް ގާއިމުކޮށްދިނުމަށާއި، އިންސާނީ ވަސީލަތްތައް ހޯދުމުގެ އިތުރުން އުނގަންނައިދިނުމާއި ކިޔަވައި ދިނުމަށް ބޭނުންވާ ތަކެތި މި އެހީ ފޯރުކޮށްދޭނެ ކަމަށް ރާއްޖޭގައި ހުންނަ އިންޑިއާ ހައިކޮމިޝަނުން ނެރެފައިވާ ބަޔާނެއްގައި ބުނެފައިވެއެވެ.

އަދި އިންޑިއާގެ 260 މިލިއަން ރުފިޔާގެ ހިލޭ އެހީގެ ދަށުން ރާއްޖޭގައި 45 އަށް ވުރެ ގިނަ އިޖުތިމާއީ މަޝްރޫއުތައް ހިންގަމުންދާ ކަމަށާއި މީގެތެރެއިން 20 އަށް މަޝްރޫއު ނިންމާފައިވާ ކަމަށްވެސް ބަޔާނުގައި ބުނެފައި ވެއެވެ.