ޔޯގާ ހަރަކާތް ހުއްޓުވި މީހުނަށް ފިޔަވަޅު އަޅާނަން: ރައީސް

ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ރަސްމީ ދަނޑުގައި މިއަދު ބޭއްވި ހަރަކާތަށް ހުރަސް އަޅައި ހަމަނުޖެހުން ހިންގި މީހުން ގާނޫނުގެ ކުރިމައްޗަށް ގެނެވޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

ރައީސް ކުރެއްވި ޓުވީޓެއްގައި ވިދާޅުވީ މިއަދު ގަލޮޅު ދަނޑަށް ބަޔަކު ވަދެގަނެ ޔޯގާ ދުވަހުގެ ހަރަކާތަށް ހުރަސް އެޅި ފަރާތްތައް ހޯދައި އެ މައްސަލަ ބެލުމަށް މިހާރު ތަހުގީގެއް ފަށާފައިވާ ކަމަށެވެ. އަދި އެ ކަމުގައި އުޅުނު އެންމެން ވެސް ގާނޫނުގެ ކުރިމައްޗަށް ގެނެސް ފިޔަވަޅު އެޅޭނެ ކަމަށް ފާހަގަކުރައްވާފައިވެއެވެ. ހަރަކާތް ހުއްޓުވި މައްސަލަ ފުލުހުން ތަހުގީގު ކުރަމުންދަނީ ސީރިއަސް މައްސަލައެއްގެ ގޮތުގައި ކަމަށެވެ.

An investigation has been launched by @PoliceMv into the incident that happened this morning at Galolhu stadium.

This is being treated as a matter of serious concern and those responsible will be swiftly brought before the law.

— Ibrahim Mohamed Solih (@ibusolih) June 21, 2022

ޔޫތް މިނިސްޓްރީއިން ޔޯގާ ހަރަކާތް ފުރަތަމަ އޮތީ ރަސްފަންނުގައި ބާއްވާ ގޮތަށެވެ.

ނަމަވެސް އެ ހަރަކާތް ބޭއްވުމާއި ދެކޮޅަށް ގިނަ އާންމު ރަށްޔިތުންނާއި ދީނީ އިލްމުވެރިން މާލޭ ސިޓީ ކައުންސިލަށް ޝަކުވާ ހުށަހެޅުމުން ރަސްފަންނުގައި އެ ހަރަކާތް ބޭވުމުގެ ހުއްދަ ކައުންސިލުން ނުދިނެވެ.

އެހެންވެ އެ ހަރަކާތް މިއަދު ހެނދުނު ގަލޮޅު ދަނޑުގައި ބާއްވަން މިނިސްޓްރީއިން ނިންމި އެވެ.

މިއަދު ޔޯގާ ކަސްރަތު ކުރަން ދަނޑުތެރޭގައި ބަޔަކު ތިއްބާ ދަނޑަށް ގިނަ އަދަދެއްގެ ބަޔަކު ވަނީ ޔޯގާ އާއި ދެކޮޅަށް އަޑުއުފުލުމަށް ފަހުއެވެ. ދަނޑަށް ވަން މީހުން ތިބީ އިސްލާމްދީނުގެ ދިފާއުގައި ހަދާފައި ހުރި ދިދަތަކެއް ހިފައިގެންނެވެ.

ޔޯގާ ހަރަކާތް ހުއްޓުވަން ވަން މީހުން ދަނޑަށް ވަނުމާއިއެކު ޔޯގާ ކަސްރަތު ކުރަން ތިބި މީހުން ވަނީ ޔޯގާ ހުއްޓާލުމަށް ފަހު ދަނޑުން ނިކުމެފައެވެ.

މި މައްސަލައާއި ގުޅިގެން ހަ މީހަކު ފުލުހުން ވަނީ ހައްޔަރުކޮށްފަ އެވެ.

އާއްމުންގެ ބައެއް މީހުންނާއި ބައެއް ދީނީ އިލްމުވެރިން ވެސް ބުނާ ގޮތުގައި ޔޯގާ އަކީ ހިންދޫންގެ އަޅުކަމެކެވެ. ޔޯގާއަކީ އިސްލާމީ ޝަރީއަތުގައި ހުއްދަނޫން ކަމެއްކަމަށް ދުނިޔޭގެ ބޮޑެތި ގިނަ އިލްމުވެރިން އިއްތިފާގް ވެއެވެ.