ނޮޅިވަރަންފަރާއި ކުޅުދުއްފުއްޓާ ދެމެދު އިތުރު ލޯންޗު ފެރީއެއް

ހދ ނޮޅިވަރަންފަރާއި ކުޅުދުއްފުއްޓާ ދެމެދު ލޯންޗް ފެރީގެ ހިދުމަތް އަޒުމް ލޯންޗް ސާރވިސް އިން ފަށައިފި އެވެ. ފެރީގެ ހިދުމަތް ހުކުރު ދުވަސް ފިޔަވާ ކޮންމެ ދުވަހުވެސް ލިބޭނެ އެވެ.

ފެރީގެ ހިދުމަތް ފެށޭނީ ނޮޅިވަރަންފަރުންނެވެ. އެރަށުން ފުރާނީ ހެނދުނު 7:00 ގައި އަދި ކުޅުދުއްފުށިން ފުރުން ހަމަޖެހިފައިވަނީ މެންދުރު 13:45 ގަ އެވެ. ކޮޅަކަށް 100 ރުފިޔާއަށް ދަތުރުކުރެވޭއިރު ދެކޮޅު ޓިކެޓްގެ އަގަކީ 150 ރުފިޔާ އެވެ.

އަޒުމު ލޯންޗު ސާރވިސް އިން ބުނީ، މި ފެރީ ދަތުރުތަކުގެ ސަބަބުން މި ދެރަށުގެ ރައްޔިތުންނަށް ދަތުރު ކުރުމުގައި ވަރަށް ބޮޑު ފަސޭހަތަކެއް ލިބިގެން ދާނެކަމަށެވެ.

އަޒުމު ލޯންޗު ސާރވިސްގައި މިވަގުތު ތިން ލޯންޗެއް އޮޕަރޭޓްކުރަމުންދެ އެވެ. އެއީ 12 މީހުންނާއި 14 މީހުން އަދި 18 މީހުންގެ ޖާގައިގެ ލޯންޗެވެ. 2023 ވަނަ އަހަރަށް 38 މީހުން ޖާގައިގެ ލޯންޗެއް ގެނައުމުގެ މަސައްކަތްކުރަމުންދާ ކަމަށް އެފަރާތުން މައުލޫމާތުދެ އެވެ.

މި ފެރީތަކުން ޖާގަ ހޯދުމަށާއި އިތުރު މައުލޫމާތު ހޯދުމަށް 9430303 އަދި 7434400 އަށް ގުޅުވުމުން ލިބޭނެ އެވެ.. އަޒުމް ލޯންޗް ސާރވިސް އަކީ މިހާރުވެސް ބޮޑު ތިލަދުންމަތީގެ ރަށްތަކަށް ޕްރައިވެޓް ދަތުރުތައް ކުރުމުގައި އަތޮޅުގެ ރައްޔިތުންގެ އިތުބާރު ހޯދަމުން އަންނަ ތަޖުރިބާކާރު ކެޕްޓަނުން ދުއްވާ ލޯންޗް ސާރވިސް އެއްކަމަށް އެފަރާތުން ބުނެ އެވެ.