ޝަވަން އަަށް ރަނިން ބްލޭޑެއް ހަމަޖައްސައި ދީފި

ނުކުޅެދުންތެރިކަމާއި އެކުވެސް ފުޓްބޯޅައިން މުޅި ރާއްޖޭގެ ސަމާލުކަން މިހާރު ހޯދާފައިވާ ހދ. މަކުނުދޫ އަހުމަދު ޝަވަން މުހައްމަދަށް ރަނިންގް ބްލޭޑެއް ހަމަޖައްސައި ދީފި އެވެ.

ބައިނަލްއަގްވާމީ ނުކުޅެދުންތެރިކަން ހުންނަމީހުންގެ ދުވަސް ފާހަގަކުރެވިގެންދާއިރު މިއަދު އަޅުގަނޑަށް ލިބޭ އެންމެ ބޮޑު ހިތްހަމަޖެހުމަކީ ޝަވަން އަަށް ރަނިގް ބްލޭޑް ހަމަޖައްސާދެވުން.
ރާއްޖޭގެ ފުރަތަމަ ރަނިން ބްލޭޑް އެތުލީޓަށް އިރާދަކުރެއްވިއްޔާ ދެންއޮތީ އިންޑިއާގައި ފަރިތަކުރުން.♥️ pic.twitter.com/CB9q7er6F3

— Ahmed Mahloof (@AhmedMahloof) December 3, 2022

ޔޫތު މިނިސްޓަރު އަހުމަދު މަހުލޫފް ކުރެއްވި ޓްވީޓެއްގައި ވިދާޅުވީ ބައިނަލްއަގްވާމީ ނުކުޅެދުންތެރިކަން ހުންނަ މީހުންގެ ދުވަސް ފާހަގަކުރެވިގެންދާއިރު މިއަދު ލިބޭ އެންމެ ބޮޑު ހިތްހަމަޖެހުމަކީ ޝަވަން އަަށް ރަނިންގް ބްލޭޑް ހަމަޖައްސައި ދެވުން ކަމަށެވެ.

"ރާއްޖޭގެ ފުރަތަމަ ރަނިން ބްލޭޑް އެތުލީޓަށް އިރާދަކުރެއްވިއްޔާ ދެން އޮތީ އިންޑިއާގައި ފަރިތަކުރުން." މަހުލޫފް ވިދާޅުވި އެވެ.

އެއް ފަޔާއެކު ފުޓްބޯޅަ ކުޅުމުން އާއްމުންގެ ސަމާލުކަން ލިބުނު، އަހުމަދު ޝަވަން މުހައްމަދަކީ އުފެދުމުގައި ވެސް އެއްފައި ނެތް ކުއްޖެކެވެ. އޭނާގެ ކަނާތު ފައި އިންނަނީ ކަކުލާ ހަމައަށް އެކަންޏެވެ.

ގިނަ ބައެއްގެ ލޮލުގައި ޝަވަން އަޅައިގަނެ، އެތައް ބައެއްގެ ލޯބި އެ މައުސޫމް ކުއްޖާއަށް ލިބުނީ ދާދިފަހުން މަކުނުދޫ ސްކޫލުން ބޭއްވި ފުޓްބޯޅަ މުބާރާތެއްގައި ޝަވަން ކުޅޭތައް ފެންނަ މަންޒަރުތަކެއް ސޯޝަލް މީޑިއާގައި ދައުވާން ފެށުމާއެކުއެވެ.

އުމުރުން މިހާރު 7 އަހަރުގެ ޝަވަން އަކީ ފުޓްބޯޅައިގެ އިތުރުން މަކުނުދޫ ސްކޫލްގެ ހުރިހާ ހަރަކާތެއްގައި ވެސް ބައިވެރިވެމުން އަންނަ ހިތްވަރު ގަދަ ކުއްޖެކެވެ.