ކާބޯތަކެތީގެ ރައްކާތެރިކަން ކަށަވަރުކުރަން ކުޅުދުއްފުށީގައި ގަސްއިންދުމުގެ ޕްރޮގުރާމެއް

ކާބޯތަކެތީގެ ރައްކާތެރިކަން ކަށަވަރުކުރުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އާއި ކުޅުދުއްފުށީ ސިޓީ ކައުންސިލް ގުޅިގެން ފަށާފައިވާ ގަސް އިންދުމުގެ ޕްރޮގުރާމުގައި ކުޅުދުއްފުށިން ގަސް އިންދުމަށް ރަޖިސްޓަރ ކޮށްފައިވާ ފަރާތްތަކަށް ގަސްތައް ހަވާލުކޮށްފި އެވެ.

މިނިސްޓްރީ އޮފް ފިޝަރީސް، މެރިން ރިސޯސަސް އެންޑް އެގްރިކަލްޗަރގެ ފިޒަރީސް ރޭންޖާ މުހައްމަދު ނާޒިމް ކޭއޯއަށް މައުލޫމާތު ދެއްވަމުން ވިދާޅުވީ ކުޅުދުއްފުށިން މި ޕްރޮގުރާމުގައި ބައިވެރިވެފައިވަނީ 54 ފަރާތަކުން ކަމަށެވެ. އެ ފަރާތްތަކަށް ހަދިޔާކުރުމަށް ޖުމްލަ 390 ގަސް ވަނީ ކުޅުދުއްފުއްޓަށް ގެނެސްފަ އެވެ.

މި ޕްރޮގުރާމްގެ ދަށުން މިއަހަރު ރަށްރަށުގައި އާންމުކޮށް ހައްދާ ޖަބުރޯލު، ފަތްކެޔޮ، ބަބުކެޔޮ، އަލަ، އަދި މުރަނގަހުގެ މުޑުވަތް އެކުލެވޭހެން ގަސްހަދިޔާކޮށްފައި ވެއެވެ.

ނާޒިމް ވިދާޅުވީ ޕްރޮގުރާމްގައި ބައިވެރިވި އާންމުގެ އިތުރުން އޮފީސްތަކަށް ހުޅުވާލި ފުރުސަތުގައި ހދ.އަތޮޅު ތައުލީމީ މަރުކަޒުގެ އިތުރުން އެމްއެންޑީއެފް އަދި ކުޅުދުއްފުށީ ސިޓީ ކައުންސިލުންވެސް ވަނީ ބައިވެރިވެފައި ކަމަށެވެ.

ޕްރޮގުރާމުގައި ސިޓީ ކައުންސިލަށް ލިބިފައިވާ ގަސްތައް އިންދުމަށް ހަމަޖެހިފައިވަނީ އެއާޕޯޓް ސަރަހައްދުގައާއި ރަށު އިރުމަތި ފަރާތު ފުއްޓަރުގެ އިތުރުން އާ ބަނދަރު ސަރަހައްދުގައި ކަމަށް ނާޒިމް ވިދާޅުވި އެވެ.

ކުޅުދުއްފުށީގެ އިތުރުން މި އަހަރު މުޑުވައް ދޭން ނިންމާފައިވާ ރަށްތަކަކީ، ނޮޅިވަރަމް، ކުމުންދޫ، ނޭކުރެންދޫ، ވައިކަރަދޫ، އަދި ނެއްލައިދޫ އެވެ. މިޕްރޮޤްރާމްގެ ދަށުން މި ރަށްތަކަށް ޖުމްލަ 2525 މުޑުވައް ހަދިޔާކުރަން ނިންމައި މިހާރު އެ މުޑުވައްތައް ފޯރުކޮށް ދިނުމުގެ މަސައްކަތް އެގްރިކަލްޗަރ މިނިސްޓްރީން އަންނަނީ ކުރަމުންނެވެ.