ޑޭވިޑް ހުންނެވީ ރައީސް ސޯލިހު ފަޅީގައި

ކުޅުދުއްފުށީ ރީޖަނަލް ހޮސްޕިޓަލު (ކޭއާރުއެޗް)ގެ ޗީފް އެގްޒެކެޓިވް އޮފިސަރު (ސީއީއޯ) އަހުމަދު ދާއޫދު، އެމްޑީޕީގެ ޕްރައިމަރީގައި ރައީސް ސޯލިހަށް ތާއީދު ކުރެއްވުމަށް ނިންމައިފި އެވެ.

އެކަން ހާމަކުރައްވާ ޑޭވިޑް ކުރެއްވި ޓުވިޓެއްގައި ވިދާޅުވީ ކޮވިޑް-19 ގެ ހާލަތާއި ގުޅިގެންނާއި، ރަޝިޔާ ޔޫކްރެއިން ހަނގުރާމައިގެ ސަބަބުން ރާއްޖޭ އިގްތިސާދަށް ބޮޑު ލޮޅުމެއް އެރިކަމަށެވެ. އަދި އެހާލަތްތައް މެދުވެރިކުރުވި އިގްތިސާދީ ތަދުމަޑުކަމުން އަރައިގަތުމަށް ރައީސް ސޯލިހު ގެންގުޅުއްވީ ހަރުދަނާ އިގްތިސާދީ ސިޔާތުތަކެއް ކަމަށް އޭނާ ވިދާޅުވެފަވެއެވެ.

އެހެންކަމުން އެހާލަތްތަކުން ލަހެއްނުވެ ގައުމު އަރައިގަތީ ރައީސް ސޯލިހު ހިކުމަތްތެރި އިގްތިސާދީ ސިޔާސަތުތަކުން ކަމަށް ވުމުން އެމްޑީޕީގެ ރިޔާސީ ޕްރައިމަރީގައި ޑޭވިޑްގެ ތާއީދު އޮތީ ރައީސް ސޯލިހަށް ކަމަށްވަނީ ވިދާޅުވެފަވެއެވެ.

The Maldives' economy took a major hit from the pandemic and the war, but President @ibusolih's wise economic policies and decisive moves helped the country recover quickly. I support President @IbuSolih as MDP's candidate for president in 2023 pic.twitter.com/xT3UDzV0O9

— Ahmed Dawood (@AhmedDavidmv) January 6, 2023

މި މަހުގެ 28 ވަނަ ދުވަހު އޮންނަ އެމްޑީޕީގެ ޕްރައިމަރީގައި، ރައްޔިތުންގެ މަޖިލީހުގެ ރައީސްގެ މަގާމު ވެސް ފުރުއްވާ ނަޝީދުގެ އިތުރަށް ދެން ވާދަކުރައްވަނީ އެ ޕާޓީގެ އިސް ލީޑަރު އަދި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހެވެ.

ޑޭވިޑް ރައީސް ސޯލިހަށް ތާއީދުކުރާކަން ހާމަކުރެއްވިއިރު ކުޅުދުއްފުއްފުށީ ސިޓީ ކައުންސިލްގެ މޭޔަރު މުހައްމަދު އާތިފް އަދި ރައްޔިތުން މަޖިލީހުގެ ކުޅުދުއްފުށީ އުތުރު ދާއިރާގެ މަޖިލިސް މެމްބަރު ޔާސިރު އަބްދުއްލަތީފް ވަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ތާއީދުކުރަން ނިންމާފައިވާކަން ހާމަކުރައްވާފަ އެވެ.