ރައީސް ސޯލިހު ފަލަސްތީނުގެ ރައީސްއާ ބައްދަލުކުރައްވައިފި

ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، ފަލަސްތީނުގެ ރައީސް މަހްމޫދު އައްބާސާ މިއަދު ބައްދަލުކުރައްވައިފި އެވެ.

ރައީސް ސޯލިހު ފަލަސްތީނުގެ ރައީސާ ބައްދަލުކުރައްވާފައިވަނީ ގަތަރުގެ ވެރިރަށް ދޯހާގައި އދ އިން އިންތިޒާމު ކޮށްގެން ކުރިއަށްގެންދާ، އެންމެ ކުޑަކޮށް ތަރައްގީވެފައިވާ ގައުމުތަކުގެ ފަސްވަނަ ކޮންފަރެންސްގެ ހަވާސާގައެވެ.

ރާއްޖެ އާއި ފަލަސްތީނާ ދެމެދު އޭޕްރިލް 4، 1982 ގައި ސިޔާސީ ގުޅުން ގާއިމު ކުރި ނަމަވެސް، ރާއްޖޭން ފަލަސްތީނަށް ސަފީރަކު ކަނޑައަޅައި އޭގެ ފަތްކޮޅު ފަލަސްތީނުގެ ރައީސަކަށް އެރުވީ މީގެ ތިން ދުވަސް ކުރިންނެވެ.

އެ ބައްދަލުކުރެއްވުމުގެ ފޮޓޯއެއް ހިއްސާ ކުރައްވައި އެ މަނިކުފާނު ކުރެއްވި ޓުވީޓެއްގައި ވިދާޅުވީ އެ ގައުމުގެ ރައީސް މަހްމޫދު އައްބާސާ ބައްދަލުކުރެއްވުމަކީ އެ މަނިކުފާނަށް ލިބިވަޑައިގަތް އުފަލެއް އަދި ޝަރަފެއް ކަމަށެވެ. އަދި، އެ ބައްދަލުކުރެއްވުމުގައި ފަލަސްތީނާ އެކު ރާއްޖެ އަބަދުވެސް ދެމިއޮންނާނެ ކަމުގެ ޔަގީންކަން އަރުވާފައިވާނެ ކަމަށްވެސް އެ މަނިކުފާނު ވިދާޅުވިއެވެ.

ރާއްޖޭން އަބަދު ވެސް ދަމަހައްޓަމުން އަންނަނީ ފަލަސްތީނާ އެއްކޮޅު އަދި އިޒްރޭލާ ދެކޮޅު ހާރިޖީ ސިޔާސަތެކެވެ. އަދި، ރާއްޖޭން އަބަދުވެސް ވޯޓު ދެނީވެސް އެ ގައުމާ އެއްކޮޅަށެވެ.