ލޯޑްބޮޑުވާ ގަޑިތަކުގައި އިރުދެކުނު ސަރަހައްދުން ކަރަންޓް ކަނޑަނީ

ކުޅުދުއްފުށީގައި ކަރަންޓް ފޯރުކޮށްދިނުމަށް ބޭނުންކުރާ ޓްރާންސްފޯމަރެއް ހަލާކުވުމާ ގުޅިގެން އެ މައްސަލަ ހައްލުކުރެވެންދެން ރަށުގެ އިރުދެކުނު ސަރަހައްދުން ކަރަންޓް ކެނޑޭނެކަމަށް ފެނަކަ އިން ބުނެފި އެވެ.

ކަރަންޓް ކެނޑެން މެދުވެރިވީ ސަބްސްޓޭޝަން 2 ގެ ޓްރާންސްފޯމަރު ހަލާކުވުމުގެ ސަބަބުންނެވެ. އެހެންވެ މިހާރު އެ ސަރަހައްދުގެ ގޯތިތަކަށް ކަރަންޓް ފޯރުކޮށްދެނީ 6 ނަމްބަރު ސަބްސްޓޭޝަނުން ކޭބަލު އަޅައިގެންނެވެ.

އިރުދެކުނު ސަރަހައްދާއި މެދުތެރޭގެ ސަރަހައްދުގައި މި ދެ ސަބް ސްޓެޝަނުން ކަރަންޓް ފޯރުކޮށްދޭ 700 އެއްހާ ގޯތި ހުރެ އެވެ.

އެހެންވުމުން ލޯޑްބޮޑުވާ ވަގުތުތަކުގައި އެ ކަރަންޓް ކަނޑާނީ އެ ސަރަހައްދުންނެވެ. ކަރަންޓް ކަނޑާ ސަރަހައްދުތަކަށް އެއްގަޑިއިރު ފަހުން ކަރަންޓް ދެވޭނެކަމަށް ފެނަކަ އިން ބުނެ އެވެ. ލޯޑްބޮޑުވާ ވަގުތަކީ މެންދުރު 11 އިން ފެށިގެން ގާތްގަނޑަށް ހަވީރު 4:30 އާ ދެމެދެވެ. ހަވީރު ފަހެއްގެ ފަހުން ކަރަންޓް ނުކަނޑާނެ އެވެ.

ފުރަތަމަ ކަރަންޓް ކެނޑުނީ ހޮނިހިރުދުވަހު ހަވީރު 16:30 ހާއިރު އެވެ. އެއަށްފަހު އެކި ސަރަހައްދުތަކަށް ކަރަންޓް ދެމުންގޮސް އެއްކޮށް ރަށަށް އަލުން ކަރަންޓް ދެވުނީ މެންދަމު 2 ޖެހިފަހުންނެވެ.