ކޮރަލްސް މަސްރޭހުގެ ޗެމްޕިއަންކަން އެސްޓީއޯއިން ހޯދައިފި

ފާރޮށި ބޭކަރީ ކޮރަލްސް މަސްރޭހުގެ ދެވަނަ އެޑިޝަންގެ ޗެމްޕިއަންކަން އެސްޓީއޯ އާރްސީން ހޯދައިފި އެވެ. ކުލަބް ކޮރަލްސްއިން އިންތިޒާމުކޮށްގެން ކުރިއަށް ގެންދާ މަސްރޭހުގެ ދެވަނަ މުބާރާތުގެ ޗެމްޕިއަންކަން އިއްޔެ އެސްޓީއޯއިން ވަނީ ހޯދާފަ އެވެ.

އެސްޓީއޯ އާރްސީން މުބާރާތުގެ ޗެމްޕިއަންކަން ހޯދީ 137.1 ކިލޯގެ މަސް ބާނައިގެންނެވެ. އެޓީމުން ވަނީ ޖުމްލަ 124 މަސް ބާނާފަ އެވެ. ދެވަނައަށް ދިޔައީ އެންމެފަހުން ބޭއްވި މަސްރޭހުގެ ޗެމްޕިއަންކަން ހޯދި އާރްޑީސީ އެވެ. އާރްޑީސީން ވަނީ ޖުމްލަ 104 މަހާއެކު 69.05 ކިލޯގެ މަސް ބާނާފަ އެވެ.

ތިންވަނަ މަގާމު ހާސިލްކޮށްފައިވަނީ ކަސްޓަމްސް އާރްސީންނެވެ. އެޓީމުން 105 މަސް ބޭނިއިރު ޖުމްލަ ބަރުދަނުގައި ހުރީ 65 ކިލޯ އެވެ. ޗެމްޕިއަން ޓީމަށް 7000 ރުފިޔާގެ ފައިސާގެ އިނާމާއި މެޑަލް ދިންއިރު ދެވަނައަށް 3000 އަދި ތިންވަނައަށް 1500 ރުފިޔާގެ ފައިސާގެ އިނާމާއި މެޑަލް ދީފައިވެ އެވެ.

މުބާރާތުގެ ވަކި ވަކި ވަނަތަކަށް ބަލާއިރު އެންމެ ގިނަ މަސް ބާނައިގެން ފިރިހެން ކެޔޮޅުގެ މަގާމު ހާސިލްކުރީ ކަސްޓަމްސް އާރްސީގެ އަލީ ވަހީދު އެވެ. އޭނާ ވަނީ ޖުމްލަ 33 މަސް ބާނާފަ އެވެ. އަންހެން ކެޔޮޅުގެ މަގާމު ހާސިލް ކުރީ ޓީމް އޭޑީކޭގެ ރަހީމާ އަލީ އެވެ، އޭނާ ވަނީ ޖުމްލަ 17 މަސް ބާނާފަ އެވެ.

އެންމެ ބަރު މަސް ބާނާފައިވަނީ ފެނަކަ ޓީމުގެ އަބްދުލް ގަފޫރެވެ. އޭނާ ބޭނި މަހުގެ ބަރުދަނުގައި 5.55 ކިލޯ ހުއްޓެވެ. އެންމެ ދިގު މަހެއް ބޭނީ ޗެމްޕިއަން އެސްޓީއޯގެ މުހައްމަދު ނިޒާރު އެވެ. އެމަހުގެ ދިގުމިނުގައި 31.5 އިންޗި ހުއްޓެވެ.

އަދި ކޮރަލްސްއިން އިންތިޒާމު ކުރާ ހުރިހާ މުބާރާތެއްގައި ވެސް އެކުލަބުން ކޮންމެވެސް އެއް ޓީމެއްގެ ފީ މާފުކޮށްދޭ ކަމަށާއި އަދި މިފަހަރުގެ މަސްރޭހުގައި ރޭ ގުރުއަތުން ހޮވިފައިވަނީ ދިރާގު ޓީމުކަމަށް މުބާރާތުގެ ކޯޑިނޭޓަރު އަމްޖަދު ހަސަން މައުލޫމާތު ދެއްވި އެވެ.

ރޭ މުބާރާތް ނިންމުމުގެ ރަސްމިއްޔާތުގެ ޝަރަފުވެރި މެހެއްމާނެއްގެ ގޮތުގައި ކުޅުދުއްފުށި ސިޓީގެ މޭޔަރު އާތިފް އަދި ރާއްޖޭގެ ޒުވާން މަސްވެރިޔާ ސާޖިން ބައިވެރިވި އެވެ. އަދި ޓީމުތައް މަހަށް ފުރުމުން އިއްޔެ ހަވީރު ކުލަބް ކޮރަލްސްއިން ވަނީ ރޮބޯމޭންއާއެކު ކުޑަކުދިންގެ ހަވީރެއް ވެސް ބާއްވާފަ އެވެ.