ވޯކްޕުލޭން އެކުލެވާލަން ހިޔާލު ހޯދަން ޑަބްލިއު ޑީސީން ކަނބަލުންގެ އަޑު

ކުޅުދުއްފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ)ގެ ފަރާތުން ކުޅުދުއްފުށީ އަންހެނުންނާ މަޝްވަރާކުރަން ބޭނުންވާތީ އަންނަ ހޮނިހިރު ދުވަހުގެ ރޭ ބައްދަލު ކުރަން ނިންމައިފި އެވެ.

ކޭއޯއަށް މައުލޫމާތު ދެއްވަމުން ޑަބްލިއުޑީސީގެ ރައީސާ ހަދީޖާ މޫސާ ވިދާޅުވީ މި ބައްދަލުވުމަކީ އަންނަ އަހަރު އެ ކޮމެޓީ ކުޅުދުއްފުއްޓަށް ކުރަން ރާވާފައިވާ ކަންތައްކަކާ ބެހޭގޮތުން ރަށުގެ ކަނބަލުންނާ ގާތުން ބައްދަލުކޮށްލާ އެކަންކަމާ މަޝްވަރާކޮށް ހިޔާލު ހޯދާލުމަށް ބާއްވާ ބައްދަލުވުމެއް ކަމަށެވެ.

މި ބައްދަލުވުމުގައި އެ ކޮމެޓީން މިހާރު ރާވާފައިވާ ކަންކަމާއި ރަށުގެ އަންހެނުން ކުރިއަށް ރަށް ބޭނުންވަނީ ކޮން ކަންތައްތަކެއް ކަމާމެދު ހިޔާލު ހޯދާ މަޝްވަރާ ކުރެވޭނެ ކަމަށް ހަދީޖާ ވިދާޅުވި އެވެ.

މި ބައްދަލުވުމުގައި ކުޅުދުއްފުށީގެ ހުރިހާ އަންހެނުން ބައިވެރިވުމަކީ އެ ކޮމެޓީ ވަރަށް އެދުމެކެވެ. ބައްދަލުވުން އޮންނާނީ އަންނަ ހޮނިހިރު ދުވަހުގެ ރޭ 20:30 ގައި އެންއޯސީ ހޯލުގަ އެވެ.