ކުއަންޓަމް ވެޓަރަންސް ކަޕް ފޯރިއާއެކު ފެށިގެން ކުރިއަށް

ނުވަވަނަ ކުއަންޓަމް ވެޓަރަންސް ކަޕް ކުޅުދުއްފުށި ސިޓީގައި ފަށައިފި އެވެ. މިއަހަރުގެ މުބާރާތް ފަށާފައިވަނީ ޖުމްލަ 12 ޓީމާއެކުގަ އެވެ.

މިމުބާރާތަކީ އުމުރުން ދުވަސްވީ މީހުންގެ ދުވަސް ކަމުގައިވާ 1 އޮކްޓޫބަރާއި ދިމާކޮށް އެދުވަހަށް ހާއްސަކޮށްގެން ކޮންމެ އަހަރަކު ކުއަންޓަމުން ބާއްވަމުން އަންނަ ވެޓަރަންސް ފުޓްސަލް މުބާރާތެކެވެ. މުބާރާތް ފަށާފައިވަނީ މިމަހުގެ 1 ވަނަ ދުވަހު އެވެ.

މިމުބާރާތުގެ މެއިން ސްޕޮންސަރަކީ ރެޑްވޭވް އެވެ. ކޯ ސްޕޮންސަރަކީ ސޯލް ފިޓު އަދި ޑިޖިޓަލް ޕާޓްނަރަކީ ދިރާގު ކަމަށްވާއިރު މުބާރާތުގެ މީޑިއާ ޕާޓްނަރަކީ ކުޅުދުއްފުށި އޮންލައިން އެވެ.

މިފަހަރުގެ މުބާރާތަށް ކުއަންޓަމުން ވަނީ މުޅިން އާ ލަވައެއްވެސް ތައާރަފުކޮށްފަ އެވެ. މިލަވަ ކިޔާފައިވަނީ ރާއްޖޭގެ މަޝްހޫރު ހިޕްހޮޕް ރެޕަރުން ކަމުގައިވާ މިއްޓުއާއި ޝަހޫ އަދި ސޮއްޕެ އެވެ.

މިފަހަރުގެ ވެޓަރަންސް ކަޕުގައި ވާދަކުރާ ޓީމުތަކަކީ ބްލޫ މާރލިންސް، ޓީމް ކެނަލް، ސިއެރާ، ދެ ކުލައާއި ސަނީ ޓޭސްޓް، ވަން ޓަޗް، ޕްރޮނޮއިޑް، ކައްސާލިގެ އިތުރުން އަލް ބަމްބިއާއި އަލް ނަސްރު އަދި ލެގާޑޯއާއި ރެޑް ޑެވިލްސް އެވެ.

މިމުބާރާތުގެ ފައިނަލް އޮންނާނީ މިމަހުގެ 15 ވާ އާދިއްތަ ދުވަހުގެ ރެ އެވެ.