ނަޞްރުގެ ދުވަހުގެ ލަވައިން ތަމްސީލް މުބާރާތްވެސް ކާމިޔާބުކުރީ ހދ އޭއީސީ އިން

ނަޞްރުގެ ދުވަހާ ގުޅުވައިގެން ކުޅުދުއްފުށީ ސްކޫލްތަކުގެ މެދުގައި ބޭއްވި ލަވައިން ތަމްސީލް މުބާރާތުގެ އެއްވަނަވެސް ހދ އަތޮޅު ތައުލީމީ މަރުކަޒު ހޯދައިފި އެވެ.

އެ ސްކޫލުން ވަނީ ބަހުސް މުބާރާތުގެވެސް ޗެމްޕިއަންކަން ހޯދާފަ އެވެ.

ކުޅުދުއްފުށީ ތިން ސްކޫލްގެ މެދުގައި ކުރިއަށްދިއަށް ލަވައިން ތަމްސީލް މުބާރާތް އޮތީ ރޭ ހދ އޭއީސީ ހޯލުގަ އެވެ. ކުޅުދުއްފުށީގެ ތިން ސްކޫލް ބައިވެރިވި މި މުބާރާތުގައިވެސް ހުރިހާ ސްކޫލަކުން ވަރަށް ފުރިހަމަ އައިޓަމްތަކެއް ހުށަހަޅައިދިނެވެ.

ނަޞްރުގެ ދުވަހުގެ ހިނގައިދިޔަ ކަންތައްތަކުގެ މައްޗަށް އަލި އަޅުވާލައި ހުށަހަޅައިދިން އެ ތަމްސީލް މުބާރާތް ބެލުމަށް ގިނަ އަދަދެއްގެ ދަރިވަރުންނާއި ބެލެނިވެރިން ސްކޫލަށް ހާޒިރުވި އެވެ.

ވަރަށް ފޯރިގަދަކޮށް ދިޔަ މި މުބާރާތުގެ އެއްވަނަ އޭއީސީ ޓީމު ހޯދީ 285 ޕޮއިންޓް ހޯދައިގެންނެވެ. 213 ޕޮއިންޓް ހޯދައިގެން ދެވަނަ އަފީފުއްދީން ސްކޫލް ހޯދިއިރު 198 ޕޮއިންޓާއެކު ތިންވަނަ ލިބުނީ ޖަލާލުއްދީން ސްކޫލަށެވެ.

ސިޓީ ކައުންސިލުން މިއަހަރުވެސް ކުލަގަދަކޮށް ނަޞްރުގެ ދުވަސް ކުޅުދުއްފުށީގައި ފާހަގަކުރަން ހަމަޖެހިފައިވާއިރު މިއަހަރު ނަޞްރުގެ ދުވަހުގެ ހަރަކާތްތައް ކުރިއަށްގެންދަނީ ހދ އަތޮޅު ތައުލީމީ މަރުކަޒާ ގުޅިގެންނެވެ.