ރާއްޖެއާއި ތުރުކީގެ ގުޅުމުގެ އާ ބާބެއް ފެށިއްޖެ: ރައީސް

ތުރުކީއަށް ކުރެއްވި ދަތުރުފުޅުގެ ތެރެއިން ދެ ގައުމުގެ ގުޅުމުގެ އާ ބާބެއް އުފެދި އެކި ދާއިރާތަކުން އެއްބާރުލުމާއި އެކުވެރިކަން ދެމެހެއްޓޭނެކަމަށް ޔަގީންކުރައްވާކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.

ރައީސް މުއިއްޒު މިހެން ވިދާޅުވީ އެމަނިކުފާނު ތުރުކީއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު އެ ގައުމުން ފުރާވަޑައިގަތުމުގެ ކުރިން ކުރެއްވި ޓުވީޓެއްގަ އެވެ. ރައީސް ވިދާޅުވީ ތުރުކީން ފުރާވަޑައިގަންނަވަނީ ކާމިޔާބީތަކަކާ އެކު އެވެ.

Departing #Turkiye after an extremely successful visit.

I am confident that this new chapter of #Maldives-#Türkiye relations will result in strengthened and broader cooperation in a far wider range of areas.

My profound appreciation to H.E. @RTErdogan and the leadership of… pic.twitter.com/0GQxAHBKSF

— Dr Mohamed Muizzu (@MMuizzu) November 29, 2023

ރައީސް ވިދާޅުވީ ރާއްޖެއާއި ތުރުކީގެ ގުޅުމުގެ އާ ބާބުގެ ނަތީޖާއަކަށް ވެގެންދާނީ މިހާރަށް ވުރެ މާފުޅާދާއިރާއެއްގައި އެއް ގައުމުން އަނެއް ގައުމަށް އެއްބާރުލުންދީ ދެ ގައުމުގެ ގުޅުން އިތުރަށް ހަރުދަނާވެގެން ދިއުން ކަމަށެވެ.

"ރައީސް އުރުދުޣާނާއި ތުރުކީގެ ވެރިން ރާއްޖެއަށް ދީފައިވާ ހާއްސަ ކަމަށްޓަކައި ދިވެހިންގެ ފަރާތުން ޝުކުރު ދަންނަވަން،" ރައީސް ވިދާޅުވި އެވެ.

ރައީސުލްޖުމްހޫރިއްޔާގެ މަގާމާ ހަވާލުވެވަޑައިގަތުމަށްފަހު ރައީސް މުއިއްޒު ގައުމުން ބޭރަށް ކުރެއްވި ފުރަތަމަ ރަސްމީ ދަތުރުފުޅުގައި ތުރުކީއަށް ވަޑައިގަތީ މިމަހުގެ 26 ވަނަ ދުވަހު އެވެ.

ރައީސްގެ މިދަތުރުފުޅުގައި ތުރުކީގެ ރައީސް އުރުދުޣާންގެ އިތުރުން އެ ގައުމުން ވަޒީރުންނާ ބައްދަލުކުރައްވާ ރާއްޖެއާއި ތުރުކީއާއި ދެމެދު ގުޅުން ބަދަހިކުރުމަށް މަޝްވަރާ ކުރައްވައި ބައެއް އެއްބަސްވުންތަކުގައި ސޮއިވެސް ކޮށްފައިވެ އެވެ.

ތުރުކީ ދަތުރުފުޅު ނިންމަވާލެއްވުމަށްފަހު މާދަމާ ފަށާ ކޮޕް 28 ސަމިޓްގައި ބައިވެރިވެވަޑައިގަތުމަށްޓަކައި ރައީސް ދެން ވަޑައިގަންނަވާނީ ޔުނައިޓެޑް އަރަބް އެމިރޭޓްސް (ޔޫއޭއީ) އަށެވެ.