މިއީ ރައްޔިތުންގެ ހައްގުގައި ސާބިތުވާންވީ ވަގުތު: ޝާހިދު

މިއީ ރައްޔިތުންގެ ހައްގުގައި އިދިކޮޅު އެމްޑީޕީގެ ހުރިހާ މެމްބަރުން ވެސް ސާބިތުވާންވީ ވަގުތުކަމަށް އެމްޑީޕީއަށް ނިސްބަތްވެވަޑައިގަންނަވާ ކުރީގެ ފޮރިން މިނިސްޓަރު އަބްދުﷲ ޝާހިދު ރޭ ވިދާޅުވެއްޖެއެވެ.

އޭނާ މިފަދައިން ވިދާޅުވެ އެކްސްގައި ޕޯސްޓެއް ކުރެއްވީ ކުރިން އެމްޑީޕީގައި ތިއްބެވި 13 މަޖިލިސް މެމްބަރަކު ރޭ، ވެރިކަމުގައި އޮތް ޕީއެންސީއާ ގުޅިވަޑައިގެންފައިވަނިކޮށެވެ.

ޝާހިދު ވިދާޅުވީ އެމްޑީޕީއަކީ ޑިމޮކްރެޓިކް އުސޫލުތަކުގެ މައްޗަށް ބިނާކޮށް ރައްޔިތުންގެ އުންމީދުތައް ހާސިލުކޮށްދިނުމަށް އުފެއްދި ޕާޓީއެއްކަމަށެވެ.

އެމް ޑީ ޕީ އަކީ ޑިމޮކްރެޓިކް އުސޫލުތަކުގެ މައްޗަށް ބިނާކޮށް ދިވެހިރައްޔިތުންގެ އުންމީދުތައް ޙާސިލުކޮށް ދިނުމަށް އުފެދި ކުރިއަށްދާ ރާއްޖޭގެ އެންމެ ދުވަސްވީ އެންމެ ފަޚުރުވެރި ޕާޓީކަން މިއަދުވެސް ހަނދާން ކުރަން.

އަޅުގަނޑުމެންގެ ޕާޓީ ވަނީ އުފަލާއި ހިތާމަޔާ، ކާމިޔާބީއާއި… pic.twitter.com/TMf7YZ7PRG

— Abdulla Shahid (@abdulla_shahid) December 28, 2023

އަދި އެންމެ ދުވަސްވީ ޕާޓީގެ ގޮތުގައި އެމްޑީޕީ އޮތް އިރު ގިނަ ހިތާމަތަކާއި، ކާމިޔާބީތަކާ ވެސް ދިމާވިކަމަށް ވިދާޅުވިއެވެ.

"އަޅުގަނޑުމެންގެ ޕާޓީ ވަނީ އުފަލާއި ހިތާމަޔާ، ކާމިޔާބީއާއި ނާކާމިޔާބީ ވެސް ތަޖްރިބާކޮށްފަ. މި ދަނޑިވަޅަކީ އަނެއްކާ ވެސް އައު ހިތްވަރަކާ އައު ޖޯޝަކާއި އެކު ރައްޔިތުންނާއި ގައުމުގެ ހައްގުގައި ސާބިތުވެ ތިބެންވީ ވަގުތު." ޝާހިދު ވިދާޅުވިއެވެ.

އޭނާ ވިދާޅުވީ މިއީ އާ އުންމީދުތަކާއި އާ ލަނޑުދަނޑިިތަކަކާއެކު ނިކުންނަންވީ ދަނޑިވަޅުކަމަށެވެ. އަދި އެމްޑީޕީގެ މެމްބަރުން ތިބޭނީ ވަރުގަދަ އަޒުމުގައި ކަމަށް ވެސް ވިދާޅުވިއެވެ.