ކުޅުދުއްފުށީ ކޯޓަށް ފުރަތަމަ ފަހަރަށް އަންހެން ފަނޑިޔާރެއް

ކުޅުދުއްފުށީ މެޖިސްޓްރޭޓް ކޯޓަށް ފުރަތަމަ ފަހަރަށް އަންހެން ފަނޑިޔާރަކު އަންޔަނުކުރައްވައިފި އެވެ. އެ މަގާމަށް އަންޔަނުކުރެއްވީ އަލްއުސްތާޒާ ހައްވާ އިބުރާހިމެވެ.

ހައްވަ މީގެ ކުރިން ހުންނެވީ ކުޅުދުއްފުށީ ކޯޓުގެ ލީގަރ އޮފިސަރަކަށެވެ. އޭނާ އެމަގާމުގައި 2019 ވަނަ އަހަރުން ފެށިގެން 2023 ވަނަ އަހަރާ ހަމައަށް ހުންނެވި އެވެ.

ށ ބިލެތްފައްސަށް އުފަން އަލްއުސްތާޒާ ހައްވަ މީގެ ކުޑަދުވަސްކޮޅެއް ކުރިން ށ ކޮމަންޑޫ ކޯޓްގެ އިސް މެޖިސްޓްރޭޓްގެ މަގާމަށްވެސް އަންޔަނުކުރެއްވި އެވެ. އެހެންނަމަވެސް އޭނާ އެ ކޯޓަށް ނުކުމެވަޑައިގެން މަސައްކަތްކުރައްވާފައެއްނުވެ އެވެ.

މެޖިސްޓްރޭޓް ހައްވަ، ކުޅުދުއްފުށީ ކޯޓަށް ބަދަލުކުރެއްވީ އޭނާ އަމިއްލައަށް އެދިވަޑައިގެންކަމަށް ޖުޑީޝަން ސަރވިސް ކޮމިޝަނުން މައުލޫމާތުދެއްވަ އެވެ. މިމަހު 17 ވަނަ ދުވަހުން ފެށިގެން މެޖިސްޓްރޭޓް ހައްވަ ވަނީ ކުޅުދުއްފުށީ ކޯޓަށް ބަދަލުކުރައްވާފަ އެވެ.

މެޖިސްޓްރޭޓް ހައްވަ އަދި މިވަގުތު ހުންނެވީ މާލޭގައި ފަނޑިޔާރުކަމުގެ ޓްރެއިނިންގ އެވެ.

ކުޅުދުއްފުށީ ކޯޓްގައި ތިން ފަނޑިޔާރުން ތިއްބަވަ އެވެ. އެއީ އަލްއުސްތާޒާ ހައްވަގެ އިތުރުން ހދ ޖުޑިޝަރީއާ ވަގުތީ ގޮތުން ހިންގުމާ ހަވާލުވެހުންނެވި އަލްއުސްތާޒް މުހައްމަދު އިސްމާއިލާއި އަލްއުސްތާޒް އިބުރާހިމް ޝާހިދެވެ.