އަޅުގަނޑު އިންތިހާބުވެގެން ސަރުކާރަށްވާނެ ދައްޗެއް ނޯންނާނެ: އަލީ ވަހީދު

އަޅުގަނޑު ރައްޔިތުން މަޖިލީހަށް އިންތިހާބުވެގެން ސަރުކާރަށް ވާނެ ދައްޗެއް ނޯންނާނެކަމަށް ކުޅުދުއްފުށީ ދެކުނު ދާއިރާގެ އެމްޑީޕީ ކެންޑިޑޭޓް އަލީ ވަހީދު ވިދާޅުވެއްޖެ އެވެ.

އަލީ ވަހީދު މިހެން ވިދާޅުވީ، ޕީޕީއެމް/ޕީއެންސީގެ ފަރާތުން ކުޅުދުއްފުށީ ދެކުނު ދާއިރާއަށް ވާދަކުރައްވާ ދެ ކެންޑިޑޭޓުންކަމަށްވާ، އައިމަނު މުހައްމަދާއި ފަތުހަތު މުހައްމަދު އެއްގަލަކަށް އަރުވައި، އެ ދާއިރާއަށް ޕީޕީއެމް/ޕީއެންސީގެ އެއް ކެންޑިޑޭޓެއް ނެރުމަށް ބޭއްވި މަޝްވަރާގެ ތެރެއިން ރައީސް އޮފީހުގެ ސީނިއާ މިނިސްޓަރު، ސްޕެޝަލް އެޑްވައިޒަރ ޓް ދަ ޕްރެޒިންޑެންޓް އަބުދުއްރަހީމް އަބުދުﷲ ދެއްކެވި ވާހަކަފުޅަކާ ގުޅިގެންނެވެ.

އަދުރޭ ވިދާޅުވެފައިވަނީ ސަރުކާރަށް ނިސްބަތްވާ ދެ ކެންޑިޑޭޓް އެއްދާއިރާއަކަށް ވާދަކުރުމުން ވޯޓްތައް ބައިވެ، އިދިކޮޅު ކެންޑިޑޭޓަށް ފުރުސަތު ބޮޑުވާނެ ކަމަށާއި އެއީ ސަރުކާރުން ބޭނުންވާ ގޮތެއް ނޫން ކަމަށެވެ. ދެކުނު ދާއިރާއަށް ވާދަކުރައްވާ އިދިކޮޅު ކެންޑިޑޭޓަކީ އަލީ ވަހީދެވެ. އޭނާއަށް އިޝާރާތްކުރާ އަދުރޭ ވިދާޅުވީ އެމްޑީޕީއަށް ގޮނޑި ލިބުމަކީ ސަރުކާރަށް ފަސޭހަވާނެކަމެއް ނޫން ކަމަށެވެ.

ކޭއޯގައި އެ ހަބަރު ރިޕޯޓް ކުރުމުން އަލީ ވަހީދު ކުރެއްވި ޓްވީޓްގައި ވިދާޅުވީ، އޭނާ އިންތިހާބުވެގެން ސަރުކާރަށް ވާނެ ދައްޗެއް ނޯންނާނެ ކަމަށާއި ނަމަވެސް ނަޔާ ކުޅުދުއްފުއްޓެއް ހޯދަން ކުޅުދުއްފުށީ ރައްޔިތުން ކުރާ އުންމީދުތަކަށް ސަރުކާރު އިޖާބަދޭވަރުކުރާނެ ކަމަށެވެ.

އަޅުގަނޑު އިންތިޚާބުވެގެން ސަރުކާރަށް ވާނެ ދައްޗެއް ނޯންނާނެ. ނަމަވެސް ނަޔާ ކުޅުދުއްފުއްޓެއް ހޯދަން ކުޅުދުއްފުށީ ރައްޔިތުން ކުރާ އުންމީދުތަކަށް ސަރުކާރު އިޖާބަދޭވަރު ކުރާނަން.
މި ޓްވީޓް ލިޔަން މިއިނީވެސް ރަށުން ކަރަންޓް ކަނޑާ ގަޑީގަ. މި ބަދަލު ކުރާނަން.https://t.co/vOuTeZBzqn pic.twitter.com/iFcCpJknku

— Ali Waheed (@ali20waheed) March 27, 2024