ދިރާސީ އަހަރު ފެށުނުއިރު ކުޅުދުއްފުށި ސްކޫލްތަކުގައި ޖާގައިގެ މައްސަލަ ބޮޑު

ދިރާސީ އާ އަހަރުގެ ކިޔެވުން މިއަދު ފެށުނުއިރު ކުޅުދުއްފުށީ ސްކޫލްތަކުގައި ތައުލީމު ހާސިލުކުރާ ދަރިވަރުންގެ އަދަދު 3009 އަށް އަރައިފި އެވެ. ފާއިތުވި އަހަރު އެ އަދަދު އުޅުނީ 3000 ގަ އެވެ.

އަހަރުން އަހަރަށް ދަރިވަރުންގެ އަދަދު އިތުރުވަމުން އަންނައިރު މިއަހަރުގެ ވެސް އެންމެ ބޮޑު ގޮންޖެހުމަކީ ސްކޫލްތަކުގެ ޖާގައިގެ މައްސަލަ އެވެ. ނިމިދިޔަ ސަރުކާރުގައި ހަދަން ފެށި ކުލާސް ރޫމްތަކުގެ މަސައްކަތް ހުރީ އެއްކޮށްހެން ހުއްޓިފަ އެވެ.

މިއަހަރު އެންމެ ގިނަ ދަރިވަރުން ތައުލީމް ހާސިލުކުރަނީ ފައުންޑޭޝަން ގުރޭޑްތަކުން ފެށިގެން ގްރޭޑް 1 ން 10 އަށް ކިޔަވައިދޭ ހދ އަތޮޅު ތައުލީމީ މަރުކަޒުގަ އެވެ. އެ ސްކޫލުގައި މިއަހަރު ޖުމްލަ 1071 ދަރިވަރުން ތައުލީމް ހާސިލުކުރާނެ އެވެ.

އަތޮޅުތެރޭގެ ސްކޫލުތަކުގެ ތެރެއިން އެންމެ އާބާދީ ބޮޑު މި ސްކޫލަށް މިއަހަރު އަލަށް ވަދެފައިވަނީ 102 ދަރިވަރުންނެވެ. އެއްދަންފަޅި ކިޔެވިނަމަވެސް މި ސްކޫލްގައިވެސް ޖާގައިގެ މައްސަލަ ބޮޑެވެ.

ފައުންޑޭޝަން ގުރޭޑުން ފެށިގެން ގުރޭޑް 10 އަކަށް ކިޔަވައިދޭ އަފީފުއްދީން ސްކޫލްގައި މިއަހަރު 1063 ދަރިވަރުން ތައުލީމް ހާސިލުކުރާނެ އެވެ. އެ ސްކޫލަށް އަލަށް މިއަހަރު ވަދެފައިވަނީ 82 ދަރިވަރުންނެވެ.

ޖާގައިގެ ދަތިކަމާ ހެދި މިއަހަރުވެސް އަފީފުއްދީން ސްކޫލްގައި ކިޔަވައިދެނީ ދެ ފަންފަޅިއަށެވެ. ޖަލާލުއްދީން ސްކޫލަށްވެސް ދިމާވެފައިވާ އެންމެ ބޮޑު މައްސަލައަކީ ޖާގައިގެ މައްސަލަ އެވެ.

ގުރޭޑް 1-12 އަށް ކިޔަވައިދޭ ޖަލާލުއްދީން ސްކޫލުގައި މި އަހަރު ޖުމްލަ 738 ދަރިވަރުން ތައުލީމް ހާސިލުކުރާނެ އެވެ. އެކަމަކު އޭލެވެލްއަށް ފެށުމުން އެ އަދަދު އިތުރުވާނެ އެވެ. އެ ސްކޫލަށް މިއަހަރު އަލަށް 45 ދަރިވަރުން ވަދެފައިވެ އެވެ.

މީގެ އިތުރުން ކުޅުދުއްފުށީގައި އަމިއްލަ ފަރާތްތަކުން ހިންގާ ޕްލޭ ސްކޫލެއްކަމަށްވާ ސްމާޓް ވޭލީ ސްކޫލުގައި މިއަހަރު 137 އެއްހާ ދަރިވަރުން ތައުލީމް ހާސިލުކުރާނެ އެވެ.

ކުޅުދުއްފުށީގެ ސްކޫލުތަކުގައި މިއަހަރު 294 ޓީޗަރުން މަސައްކަތްކުރާނެ އެވެ. އޭގެ ތެރެއިން 41 ޓީޗަރުންނަކީ ބިދޭސީ ޓީޗަރުންނެވެ.