ދެ ނަމާދު ދޭތެރޭ މިސްކިތްތަކުގައި ހިލޭ ޤާރީ ކިލާސް ހިންގަން ފަށަނީ

މިސްކިތްތަކުގައި ދެ ނަމާދު ދޭތެރޭގައި ޤާރީ ކުލާސްތައް ހިންގަން މި ހަފުތާގެ ތެރޭގައި ހުއްދަ ދޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.

މިނިސްޓަރު ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ މި ކުލާސްތައް ހިންގުމަށް މި ހަފުތާގެ ތެރޭގައި ހުއްދަ ދެވޭނެ ކަމަށާއި މި ކިލާސްތަކުގައި އިމާމުންނާއި ޤުރުއާން މުދައްރިސުންނަށް ހިލޭ ސާބަހަށް ޤުރުއާން ކިޔަވައިދީ ދަސްކޮށްދީ ހެދޭނެ ކަމަށެވެ.

މިސްކިތްތަކުގައި 2 ނަމާދު ދޭތެރޭގައި (ޤާރީ ކްލާސް) ހިންގުމަށް މި ހަފްތާފައި ހުއްދަ އަރުވާނެ. މި ކްލާސްތަކުގައި އިމާމުންނާއި ޤުރުއާން މުދައްރިސުންނަށް ހިލޭ ސާބަހަށް ޤުރުއާން ކިޔަވައިދީ ދަސްކޮށްދީ ހެދޭނެ. މިކަމަށް ޝައުޤުހުރި ފަރާތްތަކުން ފޯމު ލުމަށް މި ހަފްތާގައި ހުޅުވައިލާނެ.

— Mohamed Shaheem Ali Saeed (@Mohamedshaheem1) July 17, 2024

އަދި، މި ކަމަށް ޝައުގުހުރި ފަރާތްތަކުން ފޯމު ހުށައެޅެމަށް ވެސް މި ހަފުތާގެ ތެރޭގައި ހުޅުވާލާނެ ކަމަށް މިނިސްޓަރު ވިދާޅުވިއެވެ.

މީގެ އިތުރުން، ޒަމާނީ ޓެކްނޮލޮޖީ ބޭނުންކޮށްގެން ކީރިތި ޤުރުއާނާ ބެހޭ ގައުމީ އާ މަރުކަޒެއްގެ އިމާރާތް ބިނާކުރުމުގެ މަސައްކަތް ފަށަން ހަމަޖެހިފައިވާ ކަމަށް، ޤުރުއާން ކިޔެވުމުގެ ގައުމީ މުބާރާތުގެ ނަތީޖާ ފާޅުކުރުމަށް ރޭ ބޭއްވުނު ޖަލްސާގައި މިނިސްޓަރު ވަނީ ވިދާޅުވެފައެވެ.

މި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވަނީ ގުރުއާން ހިތުދަސްކުރާ ހާފިޒުންނަށް ދައުލަތުން ދޭ އިނާޔަތް މިހާރަށް ވުރެ ދެ ގުނަ ބޮޑުކުކުރުމަށް ނިންމަވާ އެކަން އިއުލާންކޮށްފައެވެ.