ހދ އަތޮޅަށް ހުޅުވާލައިގެން ފުޓުބޯޅަ މުބާރާތެއް، ޗެމްޕިއަން ޓީމަށް 50000 ރުފިޔާ

ހދ އަތޮޅު ކައުންސިލުން އިންތިޒާމުކޮށްގެން އަތޮޅުގެ ރަށްތަކަށް ބާއްވާ ތިލަދެކުނު ފުޓުބޯޅަ މުބާރާތުގައި ބައިވެރިވުމަށް ހުޅުވާލައިފިއެވެ.

އަންނަ ސެޕްޓެމްބަރު މަހު 6 ވަނަ ދުވަހު ކުޅުދުއްފުށީ ސްޓޭޑިއަމްގައި ބާއްވަން ހަމަޖެހިފައިވާ މި މުބާރާތުގައި ބައިވެރިވާން ބޭނުންވާ ޓީމުތަކުން މި މަހުގެ 15 ވަނަ ދުވަހުގެ 12:00ގެ ކުރިން ބައިވެރިވުމަށް އެ ކައުންސިލުން ވަނީ އެދިފަ އެވެ.

މުބާރާތުގެ ޗެމްޕިއަން ޓީމަށް 50000 ރުފިޔާ ކަނޑައަޅާފައިވާއިރު، ރަނަރަޕް ޓީމަށް ދިނުމަށް ނިންމާފައި ވަނީ 30000 ރުފިޔާގެ ފައިސާގެ އިނާމެކެވެ. މީގެ އިތުރުން މުބާރާތުގައި ގިނަ ވަނަތަކެއް ހޮވުމަށް ވަނީ ހަމަޖެހިފައެވެ. ވަނަތަކުގެ ތެރޭގައި ފެއާޕްލޭ ޓީމް، މުބާރާތުގެ އެންމެ މޮޅު ކުޅުންތެރިޔާ، މުބާރާތުގައި އެންމެ ގިނަ ލަނޑުޖެހި ކުޅުންތެރިޔާ، މުބާރާތުގެ އެންމެ މޮޅު ގޯލްކީޕަރު، މުބާރާތުގެ އެންމެ މޮޅު ޑިފެންޑަ، މުބާރާތުގެ އެންމެ މޮޅު މިޑްފީލްޑަރ، މުބާރާތުގެ އެންމެ މޮޅު ސްޓްރައިކަރ، މުބާރާތުގެ އެންމެ މޮޅު ކޯޗްގެ އިތުރުން މުބާރާތުގެ އެންމެ އުއްމީދީ ކުޅުންތެރިޔާ ހިމެނެއެވެ.

މި މުބާރާތުގައި ބައިވެރިވުމުގެ ފުރުސަތު ދިނުމަށް ހަމަޖެހިފައި ވަނީ ހދ.އަތޮޅުގައި ރަޖިސްޓަރީ ކޮށްގެން ހިންގާ ކުލަބް ޖަމިއްޔާތަކަށެވެ.

މި މުބާރާތަކީ އަތޮޅުގައި ފުޓުބޯޅައިގެ ރޫހު އާލާކޮށް ދިރުވުމަށާއި ފުޓުބޯޅައަށް ޝައުގުވެރިކަން ހުންނަ ކުޅުންތެރިންނަށާއި ޓީމުތަކަށް އެ ފުރުސަތު ހޯދައިދީ، އަތޮޅުގެ ރައްޔިތުންގެ މެދުގައި އޮތް އެކުވެރިކަމާއި އެއްބައިވަންތަކަން ދެމެހެއްޓުމުގެ މަގުސަދުގައި ބާއްވާ މުބާރާތެކެވެ.