މައިކަލްގެ ހެޓްރިކާއެކު ކުލަބް ޑޮމިނޭޓާސްއިން މަންޓާގެ މައްޗަށް ކުރިހޯދައިފި

ކުޅުދުއްފުށި ޗެމްޕިއަންޝިޕުގައި މިއަދު ހިރިމަރަދޫ ކުލަބު ޑޮމިނޭޓާސްއިން މަންތާ ސްޕޯޓްސް އެކަޑަމީގެ މައްޗަށް ކުރިހޯދާ މޮޅަކުން މުބާރާތް ފަށައިފި އެވެ.

ޑޮމިނޭޓާސްއިން މަންތާގެ މައްޗަށް ކުރިހޯދައިފައިވަނީ 4 - 0 ގެ ތަފާތުބޮޑު ނަތީޖާއަކުންނެވެ. މުޅި މެޗުގައި ވެސް މޮޅުކުޅުމެއް ދައްކަމުން ދިޔަ ޑޮމިނޭޓާސްއިން މެޗުގެ ކުރީކޮޅު ވަނީ ލީޑު ނަގާފަ އެވެ.

މަންތާގެ ކުޅުންތެރިންނަށް ހެދުނު ގޯހެއްގެ ފައިދާ ނަގާ މެޗުގެ ކުރީކޮޅު މިލަނޑު ކާމިޔާބުކޮށްދިނީ އެ ޓީމުގެ ބޭރު ކުޅުންތެރިޔާ މައިކަލް އެވެ. ފުރަތަމަ ލަނޑު ޖެހިތާ މާގިނަ އިރުތަކެއް ނުވެ އަނެއްކާ ވެސް ލަނޑެއް ޖަހައި މައިކަލް ވަނީ ލީޑު ފުޅާކޮށްފަ އެވެ. މިލަނޑަކީ އިބްރާހީމް ތަނަވަސް ކޮށްދިން ފުރުސަތަކުން އޭނާ ކާމިޔާބު ކުރި ލަނޑެކެވެ.

މަންތާގެ ފަރާތުން މިމެޗުގައި ދަށް ކުޅުމެއް ފެނިގެން ދިޔަ އިރު މެޗު ފެށިގެން ނިމެންދެން ވެސް ޑޮމިނޭޓާސްއިން ވަނީ މޮޅު ކުޅުމެއް ދައްކާފަ އެވެ.

އެޓީމުގެ ބިދޭސީ ކުޅުންތެރިޔާ މައިކަލްއާއި އިބްރާހީމްގެ ފަރާތުން ރަނގަޅު މޮޅު ކުޅުމެއް ފެނިގެން ދިޔަ އިރު ޑޮމިނޭޓާސްގެ އަހްމަދު ނަދީމް އާއި މުހައްމަދު ނަޝީދު (ފޯވާޑް) ގެ ފަރާތުން ވެސް ފޯރިގަދަ ކުޅުމެއް ފެނިގެންދިޔަ އެވެ.

އެގޮތުން މެޗުގެ ފުރަތަަމަ ހާފުގެ އިތުރު ވަގުތުގެ ތެރޭގައި އަހްމަދު ނަދީމް ވަނީ ޑޮމިނޭޓާސްއަށް 3 ލަނޑުގެ ލީޑެއް ނަގައިދީފަ އެވެ. ދެވަނަ ހާފު ވެސް ޑޮމިނޭޓާސްއިން ފެށީ ވަރުގަދަކޮށެވެ.

އެގޮތުން މެޗުގެ ކުރީކޮޅު ލިބުނު ޕެނަލްޓީއަކުން މައިކަލް ވަނީ ކްލަބް ޑޮމިނޭޓާސްއަށް ލީޑު ފުޅާކޮށްދީ އޭނާގެ ހެޓްރިކް ފުރިހަމަ ކޮށްފަ އެވެ. މެޗުގައި މަންތާއިން ވެސް ލަނޑެއް ޖެހޭތޯ މަސައްކަތް ކުރި ނަމަވެސް ޑޮމިނޭޓާސްގެ ގޯލަށް އަމާޒުކޮށް ނުރައްކާތެރި ހަމަލާއެއް އުފެއްދޭ ގޮތެއް ނުވި އެވެ.

މިމެޗުގެ މޮޅުކުޅުންތެރިއަކަށް ހޮވުނީ ކުލަބް ޑޮމިނޭޓާސްގެ ބިދޭސީ ފޯވާޑް ޗުކުވުކާ މައިކަލް އެވެ. މާދަމާ ވެސް މިމުބާރާތުގެ މެޗެއް ކުޅުމަށް ވަނީ ހަމަޖެހިފަ އެވެ. އެމެޗުގައި ބައްދަލުކުރާނީ ޒިގްޒެގް ފޯރ ޔޫތް ލިންކޭޖާ ނޮޅިވަރަމް ކުލަބް ތިލަދުންމައްޗެވެ.