ކުދި ވިޔަފާރިތައް ތަރައްގީކުރުމަށް ސިޓީ ކައުންސިލުން 11 ފަރާތަކަށް ލޯނު ދެނީ

މަސައްކަތްތެރިންނާއި ކުދި ވިޔަފާރިތައް ތަރައްގީކޮށް ފުޅާކުރުމަށް ކުޅުދުއްފުށީ ސިޓީ ކައުންސިލުން ހުޅުވާލި ފައިނޭންސިންގ ސްކީމްގެ ދަށުން ޝަރުތުހަމަވި 11 ފަރާތް ހޮވައި އެފަރާތްތަކާއެކު އެއްބަސްވުމުގައި ސޮއިކޮށްފި އެވެ.

ފައިނޭންސިންގ ސްކީމަށް ހޮވުނު ފަރާތްތަކާއެކު އެއްބަސްވުމުގައި ސޮއިކުރުމުގެ ރަސްމިއްޔާތު ބޭއްވި މިއަދު މެންދުރުފަހު އެންއޯސީ ހޯލުގަ އެވެ. އެއްބަސްވުންތަކުގައި ސިޓީ ކައުންސިލްގެ ފަރާތުން ސޮއިކުރެއްވީ މޭޔަރު މުހައްމަދު އާތިފެވެ.

ސްކީމަށް ހޮވިފައިވަނީ 5 އަންހެނުންނާއި 6 ފިރިހެނުންނެވެ. އެގޮތުން 5 އަންހެންނަށް ޖުމްލަ 492،000 ރުފިޔާ އަދި 6 ފިރިހެނުންނަށް 480،319 ރުފިޔާގެ ކުރިއަށް އޮތް 15 ދުވަހުގެ ތެރޭގައި ދޫކުރެވޭނެކަމަށް ސިޓީ ކައުންސިލުން މައުލޫމާތުދެ އެވެ.

ލޯނު ލިބުނު ފަރާތްތަކުން ކުރަން ނިންމާފައިވާ ކަންކަން:

- ފްރޯޒަން ހުނިލީ ރޮށީގެ ވިޔަފާރި.
- ފެހުމުގެ ވިޔަފާރި ކުރުމަށް.
- ދަނޑުވެރިކަންކުރުމަށް.
- ގުރުއާން ކުލާސް ހިންގުމާއި ކިޔަވައިދިނުމަށް އަދި ކޮޓަރި ކުއްޔަށް ދިނުމަށް.
- މެރިން އިންޖިނިއަރިންގ ގެ ވިޔަފާރިއަށް.
- ފޮޓޯގްރަފީގެ ހިދުމަތް.
- ބޯކޮށާ ވިޔަފާރިކުރުމަށް.
- ޕްރިންޓިންގ ވިޔަފާރިފުޅާކުރުމަށް.
- ރެސްޓޯރެންޓް ވިޔަފާރިއަށް.

މި ސްކީމްގެ ފައިސާ އަނބުރާ ތިން އަހަރުތެރޭގައި ކައުންސިލަށް ދައްކަން ޖެހެ އެވެ. މުއްދަތު ހަމަވުމުގެ އެއްމަސް ދުވަސް ކުރިން ލިޔުމުން ހުށަހެޅުމުން ގިނަވެގެން އެއްއަހަރުގެ މުއްދަތަށް އިތުރުކުރުމުގެ އިހްތިޔާރު ކައުންސިލަށް ލިބެ އެވެ.

މި ސްކީމުގެ މަގުސަދަކީ މަސައްކަތްތެރިންގެ މަސައްކަތް އިތުރަށް ތަރައްގީކޮށް ރަށުގެ އުފެއްދުންތައް އިތުރުކުރުމާއި ފަންނީ މަސައްކަތްތައް އަލަށް ފަށަން ބޭނުންވާ ފަރާތްތަކަށް މަގުފަހިކޮށްދިނުމާއި ކުދި ވިޔަފާރިތައް ފުޅާކުރުމާއެކު އާ ވިޔަފާރިވެރިން އުފެއްދުމެވެ.

އަދި މީގެ އިތުރުން ނާޒުކު ހާލަތްތަކުގައި ތިބި ފަރާތްތަކަށް އާމްދަނީ ހޯދޭނެ މަގު ފަހިކުރުމާއި އަންހެނުން މާލީ ގޮތުން ބާރުވެރިކުރުންވެސް މަގުސަދުތެރޭގަ ހިމެނެ އެވެ.