ކުޅުދުއްފުށީ ގެޔެއްގައި އަލިފާން ރޯވެ އަނދައި ހުލިވެއްޖެ

ކުޅުދުއްފުށީ ގެއެއްގައި އަލިފާން ރޯވެ އަނދައި ހުލިވެއްޖެ އެވެ.

މިރޭ ގާތްގަނޑަކަށް 21:00 ހާއިރު މި ހިނގި މި އަލިފާނުގެ ހާދިސާގައި އެއްވެސް މީހަކަށް އަނިޔާވެފައެއްނުވެ އެވެ.

އެހެންނަމަވެސް އަލިފާން ރޯވި 'ސަމޭދާނު' ގެ ވަނީ އެއްކޮށް އަނދައި ހުލިވެފަ އެވެ. މި ގެޔަކީ ފިލާ ބޭނުންކޮށްގެން ހަދާފައިވާ ގެޔެކެވެ.

މައުލޫމާތު ލިބިފައިވާ ގޮތުގައި މި ގޭގައި އުޅެނީ ދެ ފިރިހެނުންނެވެ. އަލިފާން ރޯވި ވަގުތު ގޭގައި އެއްވެސް މީހަކު ނޫޅޭކަމަށް މައުލޫމާތު ލިބެ އެވެ.

ރޯވެފައިވާ އަލިފާންގަނޑު ނިވާލީ ސިފައިނެވެ. ސިފައިންނަށް އަލިފާންގަނޑު އެއްކޮށް ނިވާލެވުނީ ގާތްގަނޑަށް 22:00 އެހާއިރު އެވެ.

މިހާދިސާގައި ހާލުގައި ޖެހުނު ދެ މީހުންނަށް ވަގުތީ ހިޔާ ހަމަޖެއްސުމުގެ މަސައްކަތް ސިޓީ ކައުންސިލުން ކުރަމުންދާކަމަށް އެ ކައުންސިލުން މައުލޫމާތުދެ އެވެ.

މިއަހަރުގެ މާރޗުމަހުގެ ތެރޭގައި މިގެޔާ ޖެހިގެން ހުރި 'ސިގްނަލް' ގޭގައިވެސް ވަނީ އަލިފާނު ރޯވި އަނދައިފަ އެވެ. އަލިފާން ރޯވި ފަހުން 'ސިގްނަލް' ގެއަށް މީހުން ބަދަލުވެފައެއް އަދި ނުވެ އެވެ.