އެކްސިޑެންޓްވުމުން މަޑުނުކޮށްދިޔަ މީހާގެ ސައިކަލް ޓޯކޮށް ވަކި މައްސަލައެއްގެ ގޮތުގައި ބަލަނީ
ކުޅުދުއްފުށީގައި ރޭ ހިނގި އެކްސިޑެންޓްގައި މަޑުނުކޮށްދިޔަ މީހާގެ ސައިކަލް ޓޯކޮށް އެ މައްސަލަ ވަކި މައްސަލައެއްގެ ގޮތުގައި ފުލުހުން ތަހުގީގުކުރަން ފަށައިފި އެވެ.
ރޭ 8 ޖަހާއެހާއިރު އަމީނީމަގު، އިސްލާމިކް ބޭންކުން ހިނގި އެކްސިޑެންޓްގައި އެއްވެސް މީހަކަށް ބޮޑު އަނިޔާއެއް ނުވެ އެވެ. އެކަމަކު ކުދި އަނިޔާވެގެން ދެ މީހުންވެސް ކޭއާރުއެޗުން ފަރުވާ ހޯދި އެވެ.
މި އެކްސިޑެންޓް ހިނގަން މެދުވެރިވީ އަމީނީމަގު އުތުރުން ދެކުނަށް ދުއްވާފައިދިޔަ ސައިކަލެއް ގޯޅިއަކަށް ވަންނަ ހުރަސްކުރަން އުޅުމުގެ ތެރޭގައި އަމީނީމަގުގެ ދެކުނުން އުތުރަށް ބާރު ސްޕީޑްގައި ދުއްވާފަ ދިޔަ ސައިކަލެއްގައި ޖެހިގެންނެވެ.
އުތުރުން ދެކުނަށް ދުއްވާފައި އައި ސައިކަލު ގޯޅިއަޅަން ސިގްނަލް ދިންނަމަވެސް އެއްވެސް ވަރަކަށް މަޑުކޮށް، މަގުން އަނެއް ފަޅިން ވެހިކަލެއް އާދޭތޯ ބަލާފައެއްނުވާކަން ވީޑިއޯ އިން ފެނެ އެވެ. އަދި ދެކުނުން އުތުރަށް ދުއްވާފައި ދިޔަ ސައިކަލްވެސް ދިޔައީ އާދަޔާ ހިލާފް ބާރަށްކަން ފާހަގަކުރެވެ އެވެ.
ފުލުހުން ވިދާޅުވީ، މި އެކްސިޑެންޓްގައި މަޑުނުކޮށްދިޔަ 37 އަހަރުގެ ފިރިހެން މީހާގެ އަތުގައި ލައިސަންސް ނެތް ކަމަށާއި އެ މީހާގެ ސައިކަލް ޓޯކޮށް މަޑުނުކޮށްދިޔަ މައްސަލަ ވަކި މައްސަލައެއްގެ ގޮތުގައި ފުލުހުން ތަހުގީގްކުރަމުންދާ ކަމަށެވެ. އެކްސިޑެންޓްވުމުން މަޑުނުކޮށްދިޔައީ އަމީނީމަގުން ދެކުނުން އުތުރަށް ދުއްވާފައި ދިޔަ މީހަ އެވެ.
މި އެކްސިޑެންޓްގައި ހިމެނޭ ދެވަނަ މީހާގެ އުމުރަކީ 24 އަހަރެވެ. މި ދެ މީހުންނަކީވެސް ދިވެހިންނެވެ. ފުލުހުން ވިދާޅުވީ، މި މައްސަލަ ތަހުގީގުކުރަމުންދާ ކަމަށެވެ.
