އޭސީސީ އަށް ކުރިމަތިިލާން ހުޅުވާލައިފި

އެންޓި ކޮރަޕްޝަން ކޮމިޝަން (އޭސީސީ)އިން ހުސްވެފައިވާ މެންބަރު ކަމުގެ ދެ މަގާމަކަށް ކުރިމަތިލާން ހުޅުވާލައިފިއެވެ.

އެ މަގާމުތަކަށް ކުރިމަތިލާން ހުޅުވާލާފައި ވަނީ އޭސީސީގެ ނައިބު ރައީސް އަބްދުއްސަލާމާއި އެ ކޮމިޝަންގެ މެންބަރު ތޯހާ މުހައްމަދު އިސްތިއުފާ ދެއްވުމާ ގުޅިގެންނެވެ.

ރައީސް އޮފީހުން ކުރި އިއުލާނެއްގައި ވަނީ، އޭސީސީގެ ދެ މެންބަރުން އިސްތިއުފާ ހުށަހަޅުއްވާފައިވާތީ، އެކޮމިޝަނުން ހުސްވެފައިވާ ދެ މަގާމަށް މިމަހުގެ 16 ވަނަ ދުވަހުގެ 12:00ގެ ނިޔަލަށް ކުރިމަތިލެވޭނެ ކަމަށެވެ.

އެ މަގާމުތަކަށް ކުރިމަތިލާން ބޭނުންވާ މީހުން މެންބަރު ކަމަށް ކުރިމަތިލާން އެދޭ ފޯމާއި އެމީހެއްގެ އިގުރާރާއި ފުރިހަމަކޮށްފައިވާ ކުށާއި ދަރަނީގެ ރެކޯޑު ފޯމާއި ސިޔާސީ ޕާޓީއެއްގައި ރަޖިސްޓްރީވެފައިވޭތޯ ބަލަން އިލެކްޝަންސް ކޮމިޝަނުން ހޯދަން ޖެހޭ ފޯމުގެ އިތުރުން ކުރިމަތިލާ ފަރާތުގެ ސީވީ ހުށަހަޅަން ޖެހޭނެ ކަމަށް އެ އޮފީހުން ވަނީ ބުނެފައެވެ.

މިގޮތުން، މަގާމުތަކަށް ކުރިމަތިލާން ހުޅުވާލާފައިވާ މުއްދަތުގައި ރަސްމީ ބަންދު ދުވަސްތައް ފިޔަވައި އެހެން ދުވަސްތަކުގެ ހެނދުނު 8:30 އިން މެންދުރު 12:00 އަށް ރައީސް އޮފީހުން އެ ފޯމުތައް ބަލައިގަންނަނާއެވެ.