ބާރު ދުވެލީގެ ފައްޓަވައި ވައުދުތައް ފުއްދަވާނެކަމުގެ ޔަގީންކަން ދިއްދޫ ރައްޔިތުންނަށް ރައީސް ދެއްވައިފި

ރިޔާސީ އިންތިހާބުގައި ހއ ދިއްދޫ ރައްޔިތުންނަށް އެމަނިކުފާނު ވެވަޑައިގެންނެވި ހުރިހާ ވައުދެއް ބާރު ދުވެލީގައި ކުރިއަށްގެންގޮސް ނިންމަވައި ދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ މުހައްމަދު މުއިއްޒު ދެއްވައިފި އެވެ.

ހއ އަތޮޅަށް ކުރައްވަމުންގެންދަވާ ދަތުރުފުޅުގައި ރައީސް ރޭ ދިއްދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ވިދާޅުވީ، އެއާޕޯޓް މަޝްރޫއު އާއި ރިޔާސީ އިންތިހާބުގެ ތެރޭގައި އެ މަނިކުފާނު ދިއްދޫ ރައްޔިތުންނަށް ވެވަޑައިގެންނެވި ހުރިހާ ވައުދެއް ފުއްދަވައިދެއްވާނެކަމަށެވެ.

އެގޮތުން މިއަހަރުގެ ތެރޭގައި އެއާޕޯޓް މަޝްރޫއުގެ އަމަލީ މަސައްކަތް ފެށުމަށް ބިން ހިއްކުމުގެ މަސައްކަތާއެކު ފައްޓަވައި އެކަން ނިންމާ ދެން ކުރަން ހުރި ހުރިހާ ކަމެއްވެސް ބާރު ދުވެލީގައި ފައްޓަވައި ދެއްވާނެ ކަމަށެވެ.

އެއާޕޯޓް ތަރައްގީކުރުމުގެ މަސައްކަތް ނިންމަވައިދެއްވާނެ ކަމުގެ ޔަގީންކަން ރައްޔިތުންނަށް ދެއްވަމުން ރައީސް ވިދާޅުވީ، އެ މަނިކުފާނު ދެން ދިއްދޫއަށް ވަޑައިގަންނަވާނީ، އެ އެއާޕޯޓަށް ޖައްސާ މަތިންދާ ބޯޓުގައި، އެ އެއާޕޯޓް ހުޅުވައިދެއްވުމަށް ކަމަށެވެ.

އެއާޕޯޓް މަޝްރޫއުގެ އިތުރުން، ބަނދަރުގެ މައްސަލަ އާއި ބައިނަލްއަގުވާމީ ފެންވަރުގެ ފުޓްބޯޅަ ދަނޑާއި އަތޮޅު ހޮސްޕިޓަލާއި ބޯހިޔާވަހިކަމުގެ މައްސަލަ ހިމެނެ އެވެ. ރައީސް ޔަގީންކަން ދެއްވީ މި މަޝްރޫއުތައްވެސް ބާރު ދުވެލީގައި ކުރިއަށްގެންގޮސް ނިންމާލަދެއްވާނެ ކަމަށެވެ.

މީގެ އިތުރުން، ދިއްދޫގައި ކުނިމެނޭޖުކުރުމުގެ ކަންކަން، ވެމްކޯގެ ދަށުން، މި އަހަރުގެ ރަމަޟާން މަސް ފެށުމުގެ ކުރިން ހަމަޖެހިގެންދާނެ ކަމުގެ ޔަގީންކަންވެސް ރައީސް ދެއްވި އެވެ.