ކުޅުދުއްފުށީ ފެނަކަ ތެޔޮ ބައުޒަރު ހަލާކުވިތާ ހަތަރު އަހަރު ފަހުން އާ ބައުޒަރެއް

ކުޅުދުއްފުށީ ފެނަކަ ތެޔޮ އުފުލުމަށް ބޭނުންކުރަމުންދިޔަ ބައުޒަރު ހަލާކުވިތާ ހަތަރު އަހަރު ފަހުން އާ ތެޔޮ ބައުޒަރެއް ފޮނުވައިފި އެވެ.

ކުޅުދުއްފުށީ ފެނަކަގައި ބޭނުންކުރަމުންދިޔަ ތެޔޮ ބައުޒަރ ހަލާކުވީ އަލިފާނުގެ ހާދިސާއެއްގައި 2021 ވަނަ އަހަރުގެ ތެރޭގަ އެވެ. އޭގެ ފަހުން އިންޖީނުގެއަށް ތެޔޮ އުފުލުމަށް ބޭނުންކުރަމުންދިޔައީ އަމިއްލަ ކުންފުނިތަކުގެ ބައުޒަރުތަކުގަ އެވެ.

މިދިޔަ ހޮނިހިރު ދުވަހު ފެނަކަ ކުޅުދުއްފުށީ އޮފީހުން އާންމުކުރި ޕޯސްޓެއްގައި ބުނެފައިވަނީ، އެ އޮފީހަށް ނުހަނު ބޭނުން ޖެހިފައިވާ ތެޔޮ ބައުޒަރު މިއަދު ލިބިފައިވާކަމަށެވެ. ކުރިން ބޭނުންކުރަމުންދިޔަ ބައުޒަރު ހަލާކުވުމުގެ ސަބަބުން މިހާތަނަށް ތެޔޮ އުފުލުމަށް ބޮޑެތި ގޮންޖެހުންތަކާ ކުރިމަތިވި ކަމަށެވެ.

އާ ބައުޒަރު ލިބި ތެޔޮއުފުލުމުގެ ދަތިތަކަށް ހައްލު ހޯއްދަވައިދެއްވާފައިވާތީ ރައީސުލްޖުމްހޫރިއްޔާ ޑރ މުހައްމަދު މުއިޒް އާއި ސަރުކާރުގެ އިސްވެރިން އަދި ފެނަކައިގެ މެނޭޖްމެންޓްއަށް އެ ޕޯސްޓްގައި ޝުކުރު އަދާކުރައްވާފައިވެ އެވެ.