twitterviber whatsapp telegramfacebookyoutube instagram
4th April 2025

އަންހެނުންގެ މަސްރޭސް އިންތިޒާމުކުރި ފަރާތް މެންބަރަށް 'އޮޅިއްޖެ'

އަބްދުލް ވާހިދު ޙަސަން
Apr 3, 2025
7

އަންހެނުންގެ ދުވަހާ ގުޅުވައި ފިތުރު އީދު ދުވަހު ކުޅުދުއްފުށީގައި ބޭއްވި 'އަންހެނުންގެ މަސްރޭސް' އިންތިޒާމުކުރި ފަރާތް ކުޅުދުއްފުށީ އުތުރު ދާއިރާގެ މަޖިލިސް މެންބަރަށް 'އޮޅިއްޖެ' އެވެ.

އޭޕްރިލް އެއްވަނަދުވަހު ބޭއްވި 'ފަރިއުތުރު ކޮރަލްސް' މަސްރޭސް ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަގައި މެންބަރު މުހައްމަދު ދާއޫދު ފާހަގަކުރެއްވީ ފާއިތުވި މަހެއްހާ ދުވަހުގެ ތެރޭގައި ކުލަބު ކޮރަލްސް އިން އިންތިޒާމުކުރި ގިނަ މުބާރާތްތަކުގެ ވާހަކަ އެވެ.

އެ މޭރުމުން ވާހަކަދައްކަވަމުން މެންބަރު މުހައްމަދު ވިދާޅުވީ، ޒުވާނުންނަށް ޕީއެސް މުބާރާތަކާއި ހަރު އުމުރުގެ ފަރާތްތަކަށް ކެރަމް މުބާރާތަކާއި ޖަމިއްޔާގެ މެންބަރުންނަށް ފުޓްސަލް މުބާރާތެއް އަދި ޑަބުލިއުޑީސީގެ ކަނބަލުން މަސްރޭސް އިންތިޒާމުކުރުމުގެ ޝަރަފުވެސް ކުލަބު ކޮރަލްސް އިން ހޯދި ކަމަށެވެ.

'ކަނބަލުންގެ' މަސްރޭސް އިންތިޒާމުކުރީ ކުލަބު ކޮރަލްސް އިން ކަމަށް މެންބަރު ވިދާޅުވުމުން އަންހެނުން ކޮމެޓީގެ ރައީސާ ހަދީޖާ މޫސާ ވަނީ އެއީ ހަގީގަތާ ހިލާފުވާއެއްކަމަށް ވިދާޅުވެ އަންހެނުންގެ ކޮމެޓީގެ ފޭސްބުކް ޕޭޖް މެދުވެރިކޮށް ބަޔާނެއް ނެރެފަ އެވެ.

އެ ބަޔާނުގައި ރައީސާ ހަދީޖާ ވިދާޅުވެފައިވަނީ، މިއަހަރުގެ ފިތުރު އީދުދުވަހު އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ފަރާތުން ބޭއްވުނު "ކަނބަލުންގެ މަސްރޭސް 2025" އަކީ އަޅުގަނޑުމެން ކޮމިޓީގެ ފަރާތުން އިންތިޒާމުކޮށްގެން ބޭއްވުނު އިވެންޓެއްކަން އެންމެހައި ރައްޔިތުންގެ މައުލޫމާތަށްޓަކާ ހާމަކުރާ ކަމަށެވެ.

އަދި އެ އިވެންޓް ހިންގުމުގެ މަސައްކަތް ހަވާލުކުރެވިފައިވާ ބިޑް ކާމިޔާބުކުރީ "ޑީޕް ފިއުޝަން" ނަމަކަށް ކިޔާ ކުންފުންޏާ ކަމަށެވެ. އަދި އެ އިވެންޓް އިންތިޒާމުކޮށްފައިވަނީ ކޮރަލް ޖަމްޢިއްޔާއިން ކަމަށް ބުނެ ބައެއް ފަރާތްތަކުން ދައްކަމުންދާ ވާހަކަތަކަކީ ހަގީގަތާ ހިލާފު ވާހަކަތަކެއްކަމަށް ހަދީޖާ ވިދާޅުވި އެވެ.

ބަޔާނުގައި އިތުރަށް ވިދާޅުވެފައިވަނީ އެ މަޢުލޫމާތު ފެތުރުމަކީ ރައްޔިތުންނަށް އޮޅުންއެރުމަށް މަގުފަހިވާނެ ކަމެކަމަށާއި އެހެންކަމުން، އެފަދަ ޞައްޙަ ނޫން މައުލޫމާތު ފެތުރުމުން ދުރުހެލިވުމަށް އެންމެހައި ފަރާތްތަކަށް އިލްތިމާސްކުރާ ކަމަށެވެ.

އެ ކޮމިޓީގެ ފަރާތުން އަބަދުވެސް މަސައްކަތްކުރަމުން ގެންދަން ބޭނުންވަނީ ހާމަކަން ބޮޑު ގޮތެއްގައި، ރައްޔިތުންނަށް ފައިދާހުރި ގޮތަށް އިވެންޓްތައް އިންތިޒާމުކުރުމަށާއި ވީމާ، މިފަދަ ކަންކަމުގައި ރައްޔިތުންގެ އެއްބާރުލުން ލިބޭނެކަމަށް އުއްމީދުކުރާކަމަށް ރައީސާގެ އެ ބަޔާނުގައިވެ އެވެ.

Kulhudhuffushi Online
Hikifinifenmaage
Maalihaa Magu
H.Dh. Kulhudhuffushi
Tel: 6528355, 7978355