މިދައުރުގެ ތެރޭގައި ކުޅުދުއްފުށީގައި ސިންތެޓިކް ޓްރެކާއި ސްޕޯޓްސް ކޮމްޕްލްކްސް ގާއިމުކުރެވޭނެ: މެންބަރު މުހައްމަދު

މިދައުރުގެ ތެރޭގައި ކުޅުދުއްފުށީގައި ސިންތެޓިކް ޓްރެކާއި ސްޕޯޓްސް ކޮމްޕެލްކްސް ގާއިމުކުރެވޭނެކަމަށް ކުޅުދުއްފުށީ އުތުރު ދާއިރާގެ މަޖިލިސް މެންބަރު މުހައްމަދު ދާއޫދު ވިދާޅުވެއްޖެ އެވެ.

އެޕްރީލް އެއްވަނަ ދުވަހު ކުޅުދުއްފުށީގައި ބޭއްވި ކޮރަލްސް މަސްރޭސް ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން މެންބަރު މުހައްމަދު ވިދާޅުވީ، މި ދައުރުގެ ތެރޭގައި ކުޅުދުއްފުށީގައި ސިންތެޓިކް ޓްރެކް އާއި ސްޕޯޓްސް ކޮމްޕެކްލްސް އަދި ދަނޑުތަކަށް ބޭނުންވާ އެހެން ވަސީލަތްތައް އިރާދަކުރެއްވިއްޔާ ގާއިމުކުރެވޭނެ ކަމަށެވެ.

ސިންތަޓިކް ޓްރެކްއަކީ އިންޑިޔާގެ އެހީގައި ގާއިމުކުރަން ހަމަޖެހިފައިވާ ޓްރެކެކެވެ. އެތަން ގާއިމުކުރަން މިދިޔަ ސަރުކާރުން އެކި މުއްދަތުތައް ދިންކަމުގައިވިޔަސް އެ ދައުރު ނިމުނުއިރު އެކަން ކުރެވޭގޮތެއް ނުވި އެވެ.

2024 ވަނަ އަހަރުގެ އޯގަސްޓްމަހު، ސްޕޯޓްސް މިނިސްޓަރު އަބުދުﷲ ރާފިއު ކުޅުދުއްފުއްޓަށް ވަޑައިގެން ވިދާޅުވީ، ޓްރެކް އިންޑިޔާގެ ލައިން އޮފް ކުރެޑިޓް، އެލްސީއޯގެ ދަށުން އެގްޒިމް ބޭންކު މެދުވެރިކޮށް ގާއިމުކޮށްފައިވާ މި ސިންތެޓިކް ޓްރެކަކީ ބޮޑު ޕްރޮޖެކްޓްގެ ތެރެއިން އެއް ޕްރޮޖެކްޓެވެ. ވަޒީރު ވިދާޅުވީ، މިދިޔަ 9 މަސްތެރޭގައި މަސައްކަތްކުރީ އެ ޕްރޮޖެކްޓް ކުރިއަށްނުގޮސް އޮތް ސަބަބު ދެނެގަތުމަށް ކަމަށާއި އެ ސަބަބަކީ ހުރިހާ އެއްޗެއް އެ ޕްރޮޖެކްޓެއްގެ ތެރޭގައި ހިމެނުމުން ކަމަށެވެ.

މިނިސްޓަރު އޭރު ވިދާޅުވީ، އެހެންވުމުން އެންމެ ފުރަތަމަވެސް އެދުނީ ސިންތެޓިކް ޓްރެކް ބައި ވަކިކޮށްލަދިނުމަށް ކަމަށާއި އޭރުން ޕްރޮޖެކްޓްގެ ބައެއް ކަންކަން މިވަގުތު ނުކޮށްދެވުނަސް މިހާރު ކުރެވެން ހުރި ކަންތައްތައް ކޮށްދެވޭނެކަމަށެވެ. އަދި މިހާރު އިންޑިޔާ ސަރުކާރުން ވަނީ އެކަން ފަހިކޮށްދީ އިންޑިޔާގެ ފޮރިން މިނިސްޓްރީން މެދުވެރިކޮށް އެގްޒިމް ބޭންކަށް ފޮނުވާފައިވާ ކަމަށެވެ.

މި ރަސްމިއްޔާތުގައި ވާހަކަދައްކަވަމުން މެންބަރު ވިދާޅުވީ، ރަށުގެ ޒުވާން މަސްވެރިން މަޖިލިސް އިންތިހާބުތެރޭގައި އެންމެ ބޮޑަށް އެދެމުންދިޔަ އެއްކަމަކީ ސްޕޯޓްސް ފިޝިންގ ބޮޔެއް އަޅައިދިނުމަށް ކަމަށާއި މިދިޔަ އަހަރުގެ ޖުލައިމަހު އެކަން ވަނީ ހާސިލުކޮށްފައިވާ ކަމަށެެވެ.

14 މޭލު ކުޅުދުއްފުށީ ބޭރުން ބޮއެއް ކެނޑިފައިވާ މައްސަލަ މިނިސްޓްރީއާ ހަމައަށް ގެންގޮސްފައިވާ ކަމަށާއި މި މަސްތެރޭގައި މި ބޮއެ އެޅޭނެކަމުގެ ޔަގީންކަން މިނިސްޓަރު ދެއްވިކަމަށް މެންބަރު ވިދާޅުވި އެވެ. މީގެ އިތުރުން އޭނާ ވިދާޅުވީ، ސައުދީ ފަންޑުގެ ދަށުން އިހަވަންދޫގައި މަސްފެކްޓްރީއާއެކު ލިބިފައިވާ އައިސްޕްލާންޓް ލިބޭނީ ކުޅުދުއްފުއްޓަށް ކަމުގައި މިނިސްޓަރު ޔަގީންކަން ދެއްވިކަންވެސް މެންބަރު މުހައްމަދު ވިދާޅުވި އެވެ.

"ކުޅުދުއްފުށީގެ ކުލަބުތަކަކީ ވަރަށް ހަރަކާތްތެރި ކުލަބުތަކެއް"

ކުޅުދުއްފުށީގެ ކުލަބުތަކަކީ ވަރަށްވެސް ހަރަކާތްތެރި ކުލަބުތަކެއްކަން ފާހަގަކޮށް މެންބަރު މުހައްމަދު ވަނީ ކުލަބުތަކުން ކުރަމުންދާ ބައެއް މަސައްކަތްތައް ފާހަގަކުރައްވައިފަ އެވެ.

އެގޮތުން ޒިގްޒެގް ޖަމިއްޔާގެ އެހީތެރިކަމާއެކު ސިޓީ ކައުންސިލުން މަށީކުޅީގައި އަޅަމުންދާ ޕްލެޓްފޯމުގެ މަސައްކަތާއި ހިރަފުހާއި ކޮރަލްސް އިން ރަށުގެ ދަނޑުތަކަށް ގިނަގުނަ އުމްރާނީ ތަރައްގީތަކެއް ގެނެސްފައިވާކަން އޭނާ ފާހަގަކުރެއްވި އެވެ. މީގެ އިތުރުން ހޭންޑްބޯލުގެ ގިނަ މުބާރާތްތަކެއް ރަށުފެންވަރުގައި ބާއްވަމުން ގޮސް، ގައުމީ ޓީމެއް އެކުލަވާލުމުގެ ރަށުގެ ކުލަބެއްގެ މަސައްކަތުންކަން ފާހަގަކޮށް އެއީ ރަށަށް ލިބިގެންދިޔަ ވަރަށް ބޮޑު ޝަރަފެއްކަމުގައި މެންބަރު ވިދާޅުވި އެވެ.

ހޭންޑްބޯލްއާ ގުޅުވައި މެންބަރު ފާހަގަކުރެއްވި ކުލަބަކީ ޑަބުލިއު ސްޕޯޓްސް އެކަޑަމީ އެެވެ.